LEAR RECHO

Atiri:- William Shakespeare

Mena alamthe pan ketok:-Sikari Tisso

Hako ahut Britain adet Lear pu inut arecho do lo. Lear asopi bang kethom. Aklengsi Goneril, adakvam Regan lapen akibisi amen ke Cordelia. Asopo kavedet ajoine la bang kethom asopi aphan recho chinghonparpik Albeny pu isi ahavar pen akethe mate ‘Duke’ aphan si Goneril ke kedo. Regan ke Cornwal a Duke aphan si kedo. Akibisi mate Cordelia ke achor avelang.

Lear recho,asopi akleng lapen adakvam; latum bang hini aphan te akibisi, chubong kangthi abang Cordelia aphan chinghonnei lo. Akleng bang hini atum ke angthin langnodakduk lapen kachebohong ta chatlotlat. Bonta Cordelia ke lapu kali. Arje abon keme asonthot si aning angthin ta keme. Cordelia aning arlo ke kadokave aphan kanghon si plengsop. Lahei aputhak alang rat det pen nong jume thang jume kelong do. Ate akleng bang hini atum laso apot si amu Cordelia aphan aning keso, kelang selet.

Lear recho sarponbom lo. Aso pinso kavedet ajoine amena adunlar pu ra komatne aphan recho arpu kepek tekangji adim ave. Apot si recho aning ke’oi the’o. Bonta kopujilang! Amena amahang kedo ako arloso saide pusitame latum bang kethom angbong det achari chalom arpu kethak tekangji si recho aning kehang .

Aning kamatha ateng si arnisi ke recho amena achakri chakor atum pen chingvai chingsai ra det kachari arpu kethakji ajo arni hot lo. Britain adet adang the bi kedo’an kethe kiding atum ta laso arni nangchetong dunpet nangji pu ra birta chala pale lo.

Kehot ateng pen ajo arni nangchok nangpleng lo. Recho kachopha alohi do’an ta mei adim aklong along nangle rinti lo. Laso amei along Burgundi a Duke lapen France adet arecho ta nangchetongdun. Latum bang hini ke recho asopi akibisi mate Cordelia aphan aning kedok kehang atum lo.

Mei kechengche ako kadokave amonit ta aning kamatha isivet---‘ kopuson pen kekheng si Lear recho , adang kethepi Britain adet, asopi bang kethom angbong kethakji ma !’ Laso kamatha pen si rat atum aning karkar phomphom lapen chonghongphrong.

Isi apor ke Lear recho asopi bang kethom aphan chevan si meimaro mate dorbar kangni ahem along nangle lo. Recho aphan man peng kipi pu ra dorbar arlo kedo arat do’an ta thurpak si arjap lo. Recho amena anghoi chingnidet aphi asopi atum ta ingnidun rinti lo. Laso aphi kachetong kethe kiding do’an ta amenamena anghoi chingni rinti lo. Penang’an dochot aphi asat lang romrom asopi aklengsi aphan rat det kethe kiding angno dipdepin sopsepin pen recho lam kihut pen dorbar pangcheng lo---

“ To ante nesopi akleng Goneril! Nangli pu’iktha, sar’eng sarru, neli, nanglipo aphan nangli ko’an si nanglining aklong pen nelikachinghon? Pini kachetongsar rat det kethe kiding do’an angno than’iktha!” Apo aphan rat angno abe kidun pen rolep te ale keklang ke mesenji pu Goneril chini. Lasi alang ingnekmon pen lam kethan pangcheng lo----

“ Arnam akanghon akele kethepik apot si neli pini nanglisopi pu ra rat det angno kacheklanglong. Neliphan pirthe nelipahache ra bang ateng bang amang amonit nelikap aman apot nangliphan nelining arlo pen ko’an si kachinghon ma, nelilam pen neli pini pajirmi thekthe. Nangliphan pen anpar kilit akanghon badu aphan ta neli pini pi thekthe. Neli’ot nelidur along kedo akeme akun, neli’arje nelibon, rat atum nelikipi man peng, nelikhi nelidat lapen nelichor nelirup aphan neli ko’an ma kachinghon lahei aphan te nangliphan si neli akele nangchinghonmu. Po! nangliphan neli nangchinghonpik pu kachepaklang atovar anpar ke neli long thekthe lo. Rat det angno nangliphan nelining alam chethanlong apot pini neli ning arongpik……!” Lamthe kangton ahut’an ke Goneril amek hilolo pen amekkri nangkibu si rat atum thekdunlong lo. Amena arat angno amat asopi akleng lapuson alamthe kejai apot Lear recho aning ingsampik lo lapen asopi akleng aphan aphu aphang phori-ingjup ra kanghon chepaklang lo. Laer recho laso ahut kaningje---

“ Pei Goneril! Nanglisonson aso kachopathelong ke kopai alam. Ilitum adet paphanthom thak lonang. Laso angbong pen ephan ke nanglipharmanlo.” Lasodet aphi asopi adakvamaphan apai recho lam arju lelo------

“ To ante,nesopi adakvam,nangli Regan apai than’iktha! Pirthe athak komat aphan si nanglining kachingsamnei lapen kachinghonnei ma?”

“ Mai po! lale rat det angno kacherju lapen kachethak ting’ei nangji alam lo ma! Neli te akleng lapen neli mu akibi nangliphan ko’an ma nangkachinghon lapen ning kachingsam, lahei aphan te neli nanglikachinghon lapen ning kachingsam kilit phan ko’an lone kopu si neli lamthe pen nangli kethanjir thekpo? Laso alam ardi kilin’i aphan pirthe athak konatne do pu te lin sita me. Neli kanghon lapen ning kachingsam ardi mek hini pen theklongphrongji apotlo.’ ---- ‘ mai pu anset alam!’Lear recho joijoi matha lo lapen akleng aphan asonthot si laphan ta aphu aphang phoroi-ingjup ra aning kangsam akanghon chepaklang lo. Ate aphan ason thakthak si laphan ta det thakpo pu ningje lo.

Ate atum bang hini aphan apo rat angno lamthe karju lapen halatum kethak esek akibisi, Cordelia ke aning kamathadam ason do’o. akai angbong komantne aphan kanghon pu angthek kavepin ate bang hini atum, apo aphan kanghon alar ahokpet ke akhi adat aphan si akele kar’i pu alam alang chini pame. Apo akhi adat kelongdun nangji apharman si pini alangtum rat det angno lapu’an alam kedok varet pu alam ta alang chini. Joijoi pen ate atum amohor lang si Cordelia lahei alam kamatha, bonta alang lason matha un’e. apo akhi adat kelongdun nangji apharmanchot apharman lapu’an lam chobei kaningje akenangso alang thek longle. Ate atum aphan karju ason si alangphan ta apo lam arju lo. Cordelia thur ra rat angno arjap si apo aphan lamthak kipi lapu helo------

“ Po! neliphan nangli pirthe nelipahache ra mesen pen nelipathe nelipading lo. Laso apharman nangliphan nelining kachingsam lapen kanghon ko’an akethe lone neli ta than pajirmi un’e. Inut so’arlo amonit, apo aphan ko’an ning chingsam lapen chinghon nangji ma, la’an akanghon lapen ning kachingsam ke nelining arlo do lo. Bonta ladak lam dolang. Neli te atum kipu ason ra nelipo aphan chinghonchot pu alam neli pini ningjeje. Lapu pulote ladak isi alam vangjuipo. Halatum amena achor,asomar,anipi ahupo lapen achor ahemtun ahembang amonit do’an aphan inghonhe ma? Aning ingsamse ma?” Lapu’an ningjedet aphi Cordelia malomso lam kaningje chington lo lapen ate bang hini amohor lang pangching lo. Amu akibisi lapuson kaningje karjulong apot recho asopi akleng lapen adakvam atum aning kajangje’ong turmut turmat lo. Asopi akibisi alam aphuthak apo Lear recho ta aning ingsamsedet lo. Tebonsita angthin kethedung abangpi Cordelia, puthot lam kaningje pangchengthu lelo…..

“ Po, pini neli ahokpet alam si rat det mate nangli ingno kaningje. Pini amat ke neli neli chor neli rup avelang. Nelining arlo akanghon do’an ta kethak adim avelang. Bonta penap jongsi neli chor do pulote laso akanghon neli chor aphan puchot kali, api apo akorte angjir mate kadokave aphan ta thakvek nangkokji. Jongsi neli kai dingpi ta neli ning akanghon nangli inutpet aphan nangsotvet nangji pulote neli penan sopo dodedet anchot lo. La ke nanglining kehang alam. nangli ning kehang alam akam aphan neli khamkhe ning hanghe”

Recho asopi akibisi lam kaningje chingtonkok lo,bonta pangthek meme alam, laso ahut meimaro arlo klek ave klok ave ra ingsamri ingsamdem. Recho asopi akibisi kapangdak alam aphuthak mei ahem arlo kedo’an kethe kiding atum ta kamunthidam si mongjetjat. Lear recho ta asopi kaningje alam aphuthak ardi pi ra matha nangkok lo. Athe asopi kopi si pini kaningje ma, lake ahokpet alam penak. Bonta recho abang ahin kaprek pen ta laso alam aphan mathadam nangkok. Recho kamatha----

“ Akleng banghini aphan te la akibisi aphan si ne akele kanghon! Bonta rat det angno pini alang lapuson kaningje ke langdam pame pulote nephan nekapatherak penak lo, apot si…..” lahei alam mathadam si recho aning jangje ra amahang chepa’ersip lo.

“ Cordelia! Nangli helo neli sopi akibisi. Nangliphan neli ko’an nangkachinghon lone la ke neli si chini. Kopuson si mei angbong, rat det angno, nangli lapuson alam kaningje nangli de kachikilikle lo? Lapu anset apot pini pen anpar ke nangli inutnut ke neli so kali lo. Adang kethepi la neli det angbong pen akemenei ahavar si nangliphan nangli kepekji pu ra neli kamatha,bonta non ke det longri longpat nangkepekji alam amat si ave lo. Nangliphan nangli kepekji ahavar alongri neli nangli te bang hini angbong achitmchit thakdak si bakkreipo. Penap pen ke nangli neli sopi pu alam ta bang angno chethan dunrinon.”

Apo alam karjulong pen Cordelia aning runhup lo. Athe, alang ahokpet alam si kaningje. Ahok alam kaningjehaidet apot apo alangphan kachoro alar adin abo si enrong. Apo Lear inut recho lo te ma, benset sita ate banghini lam chobei kaningje kopu si kenep thekthedet ma, manghu meme. Cordelia ephong adim arjaplun. Angphun kursut ra dothing, angho pen ta aning kajangje’ong lamthe ethe ta chonche. Malomso aphi Cordelia aphan aning kedok kehang bang hini arisomar aphan recho Lear arjuthu lo---

“ To nanglitum bang hini, Burgundy a Duke lapen Franch arecho atum putha, lapusonson arloso pen chepachor cheparup nanglining hanghurlang ma.”

Burgundy a duke ke kamatha—‘ ahok te ma, apo aphan’an ta aning kapangsam thekthe laso arloso aphan en ta ale kopi lo? Recho asopi benset sita ade kehoihe ajok chari chalom ajakong asonson kethedung ajakong ta alang pini kachepangbo! apot si chrechetche te chokche lo!” Bonta Franch arecho kamatha le akaprek. Menmen thurphlut ra recho adung’an dam si alang kaningje—

“ Amena apo apok’et lapen rat det angno dipdepin sopsepin ra lapu’an ahokpet alam kaningjedakdak kehaidet apot Kungripi Cordiela aphan, ning aklong pen neli Franch adet arecho amat si pini mei angbong choro’ikdet lo. Ladak pini kachetongsar kethe kiding do’an, rat det do’an ta alangli kaningje alam aphan- ‘ai ahok’ pu matha ra alanglilam ajor kipidunhai abang ave. Neli pudamji, alangli ke isi amena along amat atur kedo pen kiturbong echet minik mukita ason. Recho kethe aphutp nukrak along si alangli ke adim aklong chelong nangji apot lo. alangli pen chepachor cheparup long ra France arechopi aman apeng pilong pu ason te nelisonthot akopai keme amonit pirthe athak ave lo pu si neli mathapo.”

“ Pi ma ning kehang klemnon. Ladak adim neli nangkipudunji ajat ta ave lo. Cordelia nelisopi si kali lo. La inutnut ke pini pen anpar neli ingno vang ra amahamg nangchepaklang ta nangne lo.” Lear recho aning kipung pen alangphan kipu laso alam aphan France arecho thangnat ardi pipe. ‘Cordelia inut recho aso! Recho apot si recho akun alang’ot alangdur along do’ alam France arecho ke chini pame. Apot si lapu’an joike pen Cordelia aphan kelong ponlok apot alang kachehokso kali. Lapu recho Lear ke amena adet, asopi bang hini angbong koson si kethak kebakji pu alam si chakri chakor atum pen kachingvai dode sangse. Goneril pen Regan atum bang hini ke apo aphan thek’an ke kesar apor karengme pen pado pathak longji pu si kachchak. Chari chalom arpu asopi bang hini angbong thakdak aphi, recho amena ke aning kehang aling, asopi bang hini ahem elong dochot elong dochot pen akai kachepadampo pu chethan lo. Asopi bang hini ta apo alam along chedondun lo. Det arlo nahok le dam nahok le do pusitame, apo aphan kesar abotor kalana kalahon abang pu ra bang pharo isi a ‘Knight’ mate ban sot pathokduntoipo pu Goneril lapen Regan atum lamchak chipi rinti lo. Recho mate det kachari arpu le pidet pusitame asontin alam akam along Lear recho amena amat chelang dunkri si bidi sore pi dunbomji pu alam ta Lear recho laso ahut ningje. Asopi bang hini atum ta me’ongchot lo pu ra pudun. Lahei alam aphan lapu’an ardi pi dunde ra ingsali! Cordelia ke France arecho along dunjui lo. Recho aso kethe aso penan sopo kipi pu ra Cordelia aphan ke ardi pi ra kelangdun abang avepin lo.

Lear recho kechengsi ke asopi akleng ahem si achakri chakor pen dodun lo. Bonta alang ladak rengmesen pen kedodunlong ajo arni dingparpe. Rat det kachari arpu asopi bang hini aphan kepektangdet apot non ke alang recho kali lo. Bonta kesar apot alang non laso alam ahut pen chetnedet titi. Ephong ateng akhemeta alanglong ave lo pu alang mathakrangpo monit aphan kangki kangvai a’ot chepaprekpredet titi. Laso aphuthak asopi aning kangsamse litponbom lo. Lapu amat ta Goneril ahokpet ke kesar’eng apo aphan le kar’i kali. Akhi adat, man jot si kar’ichot; non ke pathe adim dokok lo. Goneril apo aphan kelang selet, athe aveve dodo alam pen adin abo ke’en heihu batponbom lo. Goneril amena amat si apo aphan kachelang selet lo apot, achakri chakor atum do’an ta sarbura aphan aphi’ong alam arjuje’ong lo.

Ephong ke inut a ban aphan alanglam karjuje apot sarbura aning kithi ahir chepadosak. Ame pavanglap kangton puchot kali areng ahu ta kapaso. Laso alam ha padu ke asopi along lerok. Apo lapuson keklem pu karjulong pen asopi mate Goneril ta vopongpong ason vangphlot lo.

“ Pi athe si nangli lason keklem. Kai amat neli nanglang dunkri thekthe. Nanglilong kedo la bang pharo isisa a knight atum pen kedorap kejoike alam kali. Latum pen kachesongdet ta kethedung akam.”

“ Kopi kipudamji si nangli lapuson kaningje athe ? Inut recho inut kethe pulote laso aphiphi sakor sali ban sot ke kai amat ta thokduntoi nangpo! Ban sot lapen ingphun kerai atum nangkomdunsarse te neli malomso ta do thekthe. La nanglibaan nanglisot atum aphan kepaphophrui ke akenangsot thedunglang. Latum henopik, lam arju vanve.”

“ Neli ban neli sot atum ke mesen. Neli si latum aphan kibipon. Latum keme kaheno ke neli si chini. Nangli long nangkebonduntur a knight do’an aphan latum kiru kethai kepame thektik. Apot si latum aphan kaheno kipulong athe konat ? Ethe alam dothulang, nangli anutvet aphan nangkiru nangkelangchot apharman bang pharo isisa amonit kenangsot ave. Bang phokep ke pajum nangpo. Neli ban neli sot atum ta mepikpak. Neli ban neli sot atum ta mepikpak. Latum ta nangliphan nangli kiru nangli kethai thekpo.” Aning kipung thektik pen Goneril apo aphan lam parju lo.

“ Goneril! nanligpo aphan nangli lapu’an lam keparju ke lit’ongchot lo. Nanglimena lapen nanglipo aman ajot pu alam ladak ave lo ma ?” Kesar’eng Lear recho aning jangje thektik pen asopi aphan chipu lo.

“ Hmn, man jot? Man jot konat pen si kevangpo? Nangli mena lapen nangli kevanpak amonit amokha a’ot adur alam jersobak matha lote man jot alam chini pamepo! Emena kachoklem a’ot adur keme pen si man jot ke vangji. Chini’ik lo! ” Goneril apo aphan ase kethe thektik pen ingchek ra pu lo.

Komantune ta amena apok pen che’envok asopi akleng alangphan lapuson lamthe parjuji pu Lear recho apok aningne, bonta pini alang kopi ma ano hini pen karjulong, amek hini pen kethek long, la ke ahokpet binong. Laso aphuthak aphu chu kelok parpuphlan Lear recho ko’an aning kiduk lone amena si chichini. Asopi akleng ahem pen cheterek ra adakvam ahem kepatebok damji aphan si Lear recho chisik lo.

Apo alanglong pen cheterek ra amu adakvam mate Regan ahem apai dodampo pu alam kachinijong Goneril amu aphan birta lo’et lo. Apo kopipi si kachoklem lapen aning kehang kosonson ma pu alam ta pachini’et lo. Birta long paphrang’et apot apo nanglerok te kopipi si kivi nangji ma ke Regan matha’et ra inghongding lo. Isi apor ke apo Regan ahem atoi ane pen ledam lo.

Akhi adat lapuchot kali, rat det kachari arpu ta alangtum bidi suri klem ra apo arideng pen hekphlot si cherailap lo. Lapu’an kesar tangdet, apo along pen alangtum non thangnat ta ale kelongji ave lo pu si Lear recho asopi atum kamatha. Apot si lapu’an kanghon’op pen ka’ora varet nangji athe ta ave lo pu si latum kortete ta kachingvai. Athepi alam, Lear recho pini arni ke asopi bang hini ahem along’an ta kangchekri lapen kechakmo alohi chemandet lo.

Asopi akleng ahem o tekang si Lear recho, adakvam ahem pale lo. Apo aphan ketheklong pen Regan aning karong chepaklang ke chepaklang langlang. Asopi akleng mate Goneril alangphan kipu alam do’an--- Lear recho ke asopi adakvam aphan chethanphlir lo. Apo alam angton pen arjuphlir aphi Regan thakdun lo---

“ Ne te aklang kopi ma kipu ke henone lo po! Athe recho kethe atum along kedodunji pulote sakor sali atum ta mesen a’ot pen si do,thak klem dam nangji.Laso aphuthak ta matha’iktha, lapu’an ke’ongdung sakor sali nangli kachibiprungji akenangsot ave lo. Nangli non ke recho kethe kali lo. Nangli penap amat neli te along dam ra nangli mena kechokche apot dija chohang damnon…”

Asopi akleng aphan te adakvam abang akele kahnothu ketheklong si recho Lear ke manghuhak lo lapen akai angbong aphi aphrang alam chematha si manghulun ra seksit lo. Aning kejangje’ong recho menmen hangprak -----

“ Regan! Arnisihet rat, det, kethe, kiding atum angno nangli kopisi kaningje? Pirthe athak neli nanglipo aphan le chinghonnei pu kali ma? Lapu pulote nanglitum korte bang hini chelang ra neliphan pini kopi lo neli kivi? Neli kechokche kopi ,nethan thekji ma?

“ umn, ave,kechokche ave! lapu’an arat ke’ong aphan ne te akleng nangli kepangrengpi alar ke kachoro si kenangji! Laso alar ington ingthe tekang si nelilong nangkapatebok,la ke kechokche kali!” achethe che’en’epin ra kaningje pangponglet ra Regan apo aphan aning thi lo. Asopi along kopine kethakdunji pu recho angho ingkorang anatlang,Goneril nangledun’et lo. Nangkele pen la ta nangphedunlok. Amu aphan alang kacherju----

“ Nethantha te Regan! Nephuthak laso asarbura kopipi alam si ladak nangkethan?”

“ Itum bang hini ta laso asrbura aphan inghonhe tangho te ! alangli non ke recho kali lo pu alam ta chichinine!”

“ Inut arecho amena adet chepangbonon chepangbobenon, ephong le recho lo pulote kaike ta recho lo! Non ne ke nemena adet, nemena a ser anghoi kachepangbo pu alam amat si ave, nesomar kachinghon pu si nanglitum aphan nangkebakkreichot ke! Laso aphi Lear recho thang ningjeje ra kedojoi ajir ding’o. Goneril pen Regan atum ta aning kithi turmut turmat ra doklip.

Penang ajir kiding aphi aning ke’oi thektik pen Lear recho angho chingpu lelo----

“ Pini’an ke nangtum bang hini a’ot adur nangchini pame lo. Ahokpet ke nephan le nangtum nangkanghon kali. Ne khi nedat lapen recho kethe akhemeta aphan si kanghonchot!” laso ningjedet aphi recho Lear, asopi akibisi amen cheparno si un’an chiru lo. Amena si kechokche pu ta chipu lo. Apo lapuson kachiru lapen kaningri thek longlok pusitame Goneril pen Regan ke achet ta aning oi vangve. Ke’oiji kali amena aning kehang rinti ateng pen do’an akam kechok kepleng apot aning karong ingnekmonman si do. Asopi atum pen kachebohong aningve akangtingpi apor recho Lear amena ahok kachelong bang hini amonit chepon ra konatong kedamjui lone badu ta thekdunlong vangve. Pini pen anpar ke apo aphan ora jokphlot lo, padam aling padamnang pu matha ra Goneril lapen Regan ke kacheok lapen aning kangsamsoso kali.

Apo aphan aning pathi tekanghak ra ha France arecho aphan dodamkok pusitame, Cordelia kaike ta apo aphan nangchemathaver. France le dodamkok pusitame alang kaike ta apo abirta che’enver. Laso apot si non ate atum bang hini chelang ra apo aphan aduk alak kipi abirta ta alang long. Ha kecheng pen ta apo aphan ate Goneril lapen Regan atum kopine vivekji pu Cordelia chini. Regan ahem pen apo chongvirphit pu abirta kelongjong Cordelia do thekthe sang thekthe lo. Ajat abidi pen pusitame apo aphan kachiridunji pu alang chisik lo lapen apenan along Britain kedamji ahovang chehang lo. Apenan abang Cordelia aphan chinghonpik . Lasi aning kehang ateng armu okso lodun ra apiso Cordelia aphan Britain padamtoi lo. Talo langthepi telong thepi pen hatpon ra Dover pu adim along atoi ane pen Cordelia sundam lapen boha basung chikimdam lo. Britain adet the bi padongtup ra Cordelia apo aphan keparidun pu ra monit toi lo. Ha kapadu elong adim Lear recho aphan Cordelia amena France pen kachevan amonit atum longdam lo lapen boha along van lo. Cordelia along nangkele’an ke recho Lear aphan kelang asirik avepin lo. Achu lapen angmum chingtipte ra kidinghamhum ajok laphan ingcham ason si ketheklong. Apo apok’et aphan lapuson arje pen ketheklong apot ate bang hini aphuthak Cordelia aning kipung thektik, bonta non amat ke kopi si klemthekjilang! Boha arlo vandet si Cordelia achakri chakor atum recho Lear aphan ora lo lapen pabebejoi lo.

Komat amonit si konat’an alangphan kepon lone pu recho Lear amena chipu thekthe. Boha arlo ha amekbur nangkeprang ke--- alang ingtang kuruk ahut mate recho kecho ahut kaike kabebe apahong kangdukjom athak si amena aphan kachetheklong. Lapuchot kali inut aman apeng kethedung ahem ahemphi aphan ta thek long. Kangdukjom pohui moidai athak komatne ahem arlo kabebekong amena aphan chetheklong si recho Lear manghuvong lo lapen chipu lo-----

“ Mai Arnam konat apirthe athak si pini ne nangkelerok lo ma ho!” Laso ahut Lear recho kangnektong kemepone mate kachirutong kemepone chipu thekthedet lo. Apo amek hilolo pen mekkri apum nangbu ra kakonglong theklong si a’oso ako Lear recho asopi akibisi , bonta pini ke France adet arechopi Cordelia ta amekkri chekhang un’e ra chiru lo.

“ Ne mektong kaheno ma laho! Nang..nangli nelisopi Cordelia kali ma!” Cordelia aphan langding si recho pu lo.

“ Kalang po! ne helo nangli kachinghonnei nanglisopi akibisi Cordelia. Neli te atum bang hini chelang ra nangliphan nangkachenek kaholo lapen nangkiphlung kechek alam karrjulong pen France recho asirkut arlo dojoi thekthedet si nangkachiridun pu ra neli pini ladak’an kevang lo.” Cordelia apo adung akengphu patongrui ra ingnilun pen aphu aphang phoroi ra ang’om ingjup lo lapen panglenjon pen pu lo.

“ Pei, Cordelia! Nephan nang nedijatha! Nangdung ne kechokche thepik lo. Pini ne lapu’an kisung kepho arni nangliphan nangkachetheklong ke kopi akopai lone neli chipu thekthe. Pini nangli neliso si nelimek nekangpu lo. Nangte atum bang hini atum alam karju lapen nening arlo kedo akchokche ajok si neli nangliphan neliso kali pu nanglipu longbin lo. Recho kethe asovek pusita chari chalom anghoi athak kangni ajakong neli si nanglirideng pen nangthi bor’idet lo. Pei, Cordelia neliphan neli dijatha!” Asopi aphan aphu arbakchek ra bihek ako kangjup kanghon ason aning plilim’an ingjup ra apo Lear recho kanghon chepaklang lo. Cordelia aphu athak apo amekkri apum mu ko’antong kakonglongpon lone; badu ta pudun thekthe.

Goneril lapen Regan atum, amu akibisi abang armu okso chevan ra ha Frence pen vang si Britain adet nanglut’etlo pu abirta long’et lo. Laso abirta kelongjong latum ta amena armu okso kachisik dode sangse . Malomsovet angbong amu akibisi boha basung nangkedo adim ledam’et lo. Ke’ongdung Brtish armu okso France atum aphan chebordampak lo . Mek liplap angbong tengkheng si apo Lear recho lapen amu akibisi, France arechopi mate Cordelia aphan nep ingnang ra ha phatek bengdamrui lo.

Goneril pen Regan Cordelia aphan apran si karmut. Cordelia aphan pathidamlotnon pu latum monit toi’et lo.Lapu ma sipute laso alam pen latum kortete angbong kachebohong ame vanglap lelo. Regan aphan Goneril amena si bap pidet. Laso ahutvek si Goneril apenan mate Albeny a Duke apai eson alam nangpaklang tanglelo. ‘Nephan joijoi pen nepran nekarmut’ pu alang apiso aphan lam arbok tanglo. Akorpi Cordelia aphan apran karmut alam ta Duke ke birta kelongdun der’o. ‘Lapuson le kechokji ma, non amat monit toi ra Cordelia apran amui ke’endetji pu kedam atum aphan khamkhedunnon’ pu monit toidun lo,bonta latum keledun’an ke France arechopi mate Lear recho asopi akibisi, Cordelia acham dam’et lo. Ha padu ke lapu laben katherak amat Goneril ta amena amat chepathilot.

Aning chekhang un’e si Duke amena amat ahupo Lear recho lapen akorpi Cordelia aphan kebeng adim dam lo. Bonta alang Cordelia aphan akereng ke longdamdedet lo. Cordelia kithitang arpum arbak ponham si Lear recho a’osa adung’an pon lo. Aning ke’oi kethe’ong apot laso ahut recho thang ta ningje thekthedet . A’osa mate Albeny a Duke ta lapu thakthak. Bang hini ta chelangphrong pen penang’an apor kedo aphi ahupo abang aning ke’oi thektik pen lam ningjethu lo----

“ Chelangnon jo! Monit apran amui ke’en thekrei asong! Ne kachinghon thektik nesopi akibisi aphan’an ta nangtum lason si nekivipi! Ne lapu’an nening kachingsam, kapapumi amir ason keklar’etpi nesopi pini piban achet pen kaselam akumlin ason achethe ave pusita kacharbaknang……! Recho kachiru kaningje along Duke ajat ta thakdun thekthedet lo. Lear recho lapen a’osa, Albeny a Duke aphan laso ahut kelang pen emekkri jangdunring anpin.

“ ...langhurtha acehthe le avedet lo pusitame, neso akibisi aphan pini ne kachethek long ke-- ipu mongvepi adihu kepapumi amir ason! Ko’an keklar ko’an kangjang! Nangtum pi lo kachinipo? Arje abolon puchot kali, aning angthin kemepar, angnim kanempru pirthe pen keklanjin, ipu amir ason!la neso aphan nangtum chininedet lo. laso angnim kanempru ta nangtum asonson akamathachot atum ke longdun thekthe det lo!” Aning ke’oi kanlit thektik pen kesar ra aphu chu kelok keparpuphlan Lear recho puthot amek hilolo pen nangkilikrenri amekkri cheven si kithiang asopi aphu aphang phoroi ra puthu lo—

“ Pei Cordelia! thurnon, thur ra ephong’an ke nephan karjumepar nangse akelangpi pen ‘po’ pu nehangtha! thurnon, pei, Cordelia! France arechopi....! Pini pen anpar nang ave lo pu ne koson si kekroipo?”Achethe kavetang asopi aphu along tongchok ra ko’an ajak kiding aportong kachiru lone recho amena chipu thekthe. Albeny a Duke mate a’osa ta ahupo aning ke’oi pen kachiru kacharnap amek hini pen langdunlor anpar ajat ta klem thekthedet lo. Duke ta kamatha kisung chadi lo.

Lear recho kachiru ase ha aphi’an ke bipik khangjang lo. Karjap kedo chepathir un’e si isi apor Recho kreprok lo. Puthot ningduk alam; asopi pen chepaphuchom si Lear recho ta achethe chivung ra ha chom chevoijui lo. Lammet kuru sarpo William Shakespeare kepajirmi pen ketok Lear recho alammo ta ladak si jutkok lo.