Klimsomar alammet

SELEM LAPEN KUWUK

( Bali adet atomo)

Atiri:- Sidarta Vijaya

Tok kirla:- Sikari Tisso

Indonesia anitur anat Bali pu isi adet do. Bali pu isi alanglom amen pen si laso adet amen kachelong. Laso adet amonit atum aphan areng kelok alam pen ke Balinese pu si kipu. Balinese a’osomar atum ta nangtum asonthot si tomo tomi karju aning hangpikpak. Pini ke Bali adet atomo ijir le chethan lonang.

Edon akiripo ahem ejon ‘Siap selem’ mate vo’ikpi asomar chirijai do lo. Asomar chiripon si laso avo’ikpi kachopandam kahelososo kali. Latum kachopan lapu’an si aklem kiding – mantune ke ha rong achar angnam ephar’an ta lerok titi. Thengpi thengphrang arum bithe kedo misit miso, ingki ingket, karlo heihu si laso avopi asomar aphan karkepipi.

Arnisi ke sining angsong inghun op’lu. Arni ko’antong kedolangne kelang pen chini un’e. Chomathakrang amat vo’ikpi abang asomar pen chopanbom chopanbom amat ha ingnam ajo dolinver. Asomar atum ke api aphan chipubom lo—

“ Pei, arni chiplirplir tanglo, hem damlonang. Arve ta nangjangji nangnak’ong. Arve nangjangdut te langroi hatpon ra ehem chedam thekthedetji.” Asomar kehangjo arjulong si apei abang ke kipudun—

“ Lu varettha, Chopan ma chopan sipotlo bo!” Apei alam charju si asomar ke kachopan ma kachopan lo. Bonta malomsovet angbong sining nang’ingting lapen arve kethepi nangjang tanglo. Siap selem asomar pen konatne kachitibindamji apor’an ta cholong thekthedet lo. Abidi chinine’ong laso siap selem, asomar pen erong thengpi arum along cheborchom ra arve chersiraplun lo. Ha arve keham’an ke latum kedo’an ta jumlunlan lapen arveng pakleisoisai lo. Halapu ke Chenam pha chenam, hem kachedamji atovar along kedo alangso ke nangthe si parai harai kungmailet tanglo. Lapu laben arni ta amahang kave lo. Kangting apor asomar kibi kithi chiripontoi ra lang kehatpon ke kejoike alam kali . Chethan aling sita Siap selem kamatha sung tanglo.

Siap selem matha aling matha ra ha kapadu ke alang pen arni dingklui aphrang kachichini,‘Meng kuwuk* ahem si asomar pen kivurdamji alam matha lo. Bali adet amonit aum meng mate meng kalu aphan meng kuwuk pu si kipu. Meng kuwuk ahem ke lang hathe ako si kepho.

Siap selem inghap pachengdam si hangdam lo—

“ Kok kok, jirp meng kuwuk, nanbang hem do ma !”

“ Miyaon,miayaon! chik chok, kik kok, komat lo ho? Batai hini kethom kehang aphi meng kuwuk hem nang chingpuvong si nangthakdun lo.

“Komat komut kali lo, ne nangjirpi Siap selem si apun achak le un’e ra nanghem nangrit nangkapatebok lo ho, nechakji ma nechakche ma?

“ Mai lam ta, pini penap ajirpi kalidet le, kopu si nangphan ne hem nangkechakchedetpo ma? Vangnon vangnon, vang seraknon, arve ham pamemelang jo! Mengkalu alam kedokso kali.

Ajirpi barim lamdok lamsm pen alangphan hem arlo kachehangpon arju long si Siap selem aning arnongpik lo. Asomar pen Siap selem meng kuwuk ahem arlo kitun kedang angdeng along ihi atok anat si laso aningve domrapchom lo.

Jirlo apor nangle tanglo. Kedo kethak adim kachelar apot Siap selem asomar ke amek kejang thevangve ajir dingpiklang. Bonta narlosini kachopan kachojui kelak apot ejon aphi ejon amek jang junjun junjun amat jangklip lo. Bonta apei mate Siap selem ke amek jangje ra dothing. Athe ma alang aphrang pen ta meng kuwuk a’ot adur chini pame. Alang pini akejoi le alam kedok varet kali, kopine eson doji pu alang chini. Ahok ta ahok, ejon miyaon, ejon miyaon pu ra isi apor ke meng kuwuk asomar amek nangprang rinti ra chulang kehang kapanija kam kethe lo. Ejon abang kitun kedang angdeng anat pen kopi angnim si paningve ke kevanphlung ma pu apei aphan charju lo. Meng kuwuk asomar aphan chethan lo—

“ Dokliptu ho, doklip, ningve asonthot ekopai keme ke pi si dolang ma? Ningve ke itum han chomepikji. Ha nenimso ako ajirpi Siap selem si asomar nangchritoi ra itum ahem boha nangkedo. Latum athu dopipak lo. Ko’an lo nangtum kechodetji? Non malomso aphi te ne kopi si keklemji ma nanglangdun rintinon.”

“ O pei,nephan ke arveng do’an nepi’etnon dei, ne hijap kaselamji”— kuwuk asopi ejon abang pu lo. Horiseirinon, latum nang’arjudun longlok te katlappo” pu ra kopi koson si keklem nangji ma, angton alam apei mate meng kuwuk abang asomar aphan palamso ra than lo. Apei kapalamso arjulong si meng kuwuk asomar ke doklip lo.

Meng kuwuk amena asomar aphan kachethan alam do’an Siap selem ke arjudunlonglap. Lasi alang ta dojoije ra asomar do’an aphan chingthurlap ra angton alam thanphlir lo. Asomar aphan amek kejang pachekrong si kekatji atovar kopu si kedo ma, apei abang kiri chitinglap lo. Siap selem abang isi apor ke asomar lapen amena amat kekatji atovar thek long lo. Kitun kedang angdeng ihin anat isi thengpi aro nangkekurlen do. Laso aro teroipon ra ha langparai ingjarponphit me. Arve ta ham lo, bonta lang ke chersanselang. Malomso aphi ejon aphi ejon teroiponjoijoi ra siap selem asomar ingjarpon rinti lo. Laso kangjarpon arki arjudun longlok si meng kuwuk ke handgun lo—

“ Kopi arki si kedojam mati Selem?”

“ Sarnung athak thengpi arvo apak kethe le nangkeklo kali pu he?” Meng kuwuk aphan Siap selem si arju parlinthurong lo. Lapuson si selem asomar kedo’an ingjarlap lo, bonta akibisi kareng’angjang abang ke ingjardun thekthedet. Athe la abang ke avengkong ta ingtangtelang lapen angmi, arveng heihu ta vang pamemelang. Aso akibisi aphan lasi selem chethan tekang lo—“ Nang ajat ta matha chepasungri, mo nangphan nangchopo pulote ne ke ne’ok hodaklang, ne arveng vangvetik ke ne thu ta ave lapen cho ta chomeme pu le chethandunnon.” Api kepare tekang alam aso kroihop lo. Siap selem ta asomar atum kangjar asonthot ingjar ra katdunjui lo.

Penang’an apor aphi ke meng kuwuk abang Siap selem lapen asomar aphan kenepdamji pu ra domponnep nep ra damjoijoi lo. Bonta thangnat api ta alang thek longledet. Selem aso akibi abang ke laso ahut kaphere amat isi arlong ki’ik abin chepatujoi. Meng kuwuk ke laso angnim longlok ra kamatha—‘ laso aki’iksip ke selem anpar ajat ta kali lo, apot si pini ke nangdin lo’ pu amat akeng chimi hilolo papar pame angho ingkoham si penang akahelo pen atir che’en pame ra chon lo, Bonta oi’elang! konat aselem si alang kephokhraijilang? Laso arlong ikpo aphan si ajakong dotik pen kordam lo. Kekordam ale ke aso apak si jokphun ra avi nangklo lo. Akeng chimi amokha ta penang’an ke chebeng lo. Lapuson kachetheklong apot meng kuwuk aning jangjepik lo. ‘Selem nephan ne chongthuidet’ pu meng kuwuk asomar aphan chethan lo.

Lapu laben adap ingthangchit lo. Isi apor ke kuwuk asomar selem asopi akibi aphan thek longlok amat cheto cheto ra nepchek. “Pinithu ke nangpran lo. Nepei aso kapajokphun abang nang helo, apot nang ke nahok ta dam longle lo.” Selem asopi ke bonta latum aphan pherere. La abang thakdunthudet:-- “ e, ik atum, lapu kalilang ho, nebang ne langrei ta nangtum chini nangji le,. Ne arveng’an ta vangvelang, ne thu konat pen lo kedopo? Non ke ne’ok hodakjilang. Koson lo nangtum nephan non le ne kechomepo, ma kopu lo pinu? Apei kethan tekang abidi ateng selem aso abang chepareset si meng kuwuk aphan arju lo. ‘ Ai, ahok pu meng kuwuk lapen asomar atum matha si kroihophap lo. Selem aso aphan latum ‘pulu’(ingkro) along thapdamthot lo.

Selem asopi pulu arlo kachethapnang ajir dingklong lo. Abang bithe angmi anpar ta avengkong along arveng ta vang si dinglenlen lo. Halapu langparai pen apei abang ke arnivang ta anerlo penang’an apor lote ‘kokkedak kokkedak’ pu ra asopi aphan nagchehangbom lo.

Arnisi ke Selem asopi lasi meng kuwuk aphan pu lo—

“ Mai pinu, la ne ikmar atum kilu rinti he, nangtum apulu arlo ne kedo ajir ding’o lo. Jo nanglangnon, ne areveng, ne ingmi heihu ta dingpikpak lo. Ne thu ta do’o lo. Nephan nechoche lo ma latum? Nang amat ta laso alam tingnebup lo ma?”

“ Choji ti ho, kechochedetjilang ma, nang thu padochet sinang pu si nang kelangding lo.” Meng kuwuk thakdun lo.

“ Choji te nephan hong nepon nangpo pinu!? Kuwuk aphan selem asopi pu lo. Ahok ta ahok lo pu amat kuwuk selem asopi aphan hong vandet . Selem asopi puthot puthu lo –

“ Lapu kalilang ho. lapu’an adin lapu’an akai pulu arlo kachethaplok apot ne keng honghap’et lo. Nechoji benset sita ne keng pen phamri ke nephloktha.”

‘Kalanglo aduk dopikpo ingsali!’ pu matha amat selem asopi akeng along pen kuwuk phamri phlokjok lo. Laso kephlokjong dihu isi atir che’en ra selem asopi ingjarphit ra ha parai alangphan kanghongding apei lapen a’ikmar atemar along palerok. Kangjarpon ahut “dampo deiho pinu!” pu kuwuk aphan hang tekanglang.

“ Miyaon, miyaon, bai nening kajangje! Siap selem asopi kangjarpon langdunding si meng kuwuk ke akeng pen angtur chevenmir. !

*****

* Siap selem:- Balinese alam pen Vo’ikpi

*Meng kuwuk:- “ “ ” Meng kalu