JAYAPRANA

( Ning chedok chehang arni amen pen ijir Bali adet atomo)

Atiri:- Sidarta vijaya

Tok kirla:- Sikari Tisso

Hako ahut Bali adet anilip anat Kalianget pu isi arongsoso along edon amonit do lo. Laso ahem along kadokave bang therok amonit do. Api apo lapen asomar bang phli. Ningduk alam, halaso ahut Bali adet arlo ‘vur’ kithur amat apirthe pen monit kithi kejang dopik. Kalianget arong asor ta laso avur alng kithidun dopik lo. Laso atomo along kepho ahem ta pinsoso arlolo bang phli osomar jokjak bang kethom a’osomar ke thidunlap lo.

Osomar do’an angbong pen adakvamso inutvet si abang si pajangre- dunling ra rengdunchot lo. Laso ajangreso amen Jayaprana. Jayaprana kapajangre bipiklang. Kopai keme, koson pen lone recho amonit atum det angkang bithe rong rup kahumridam ahut si Jayaprana aphan thekpon longlok. Ingjinso’ong amat si recho amonit atum Jayaprana aphan pondet. Jyaprana recho ahem si- recho kethe aso asonthot thedun dingdun ra isi apor ke pariso ingtangrak lo.

Arje abon akrom ajom kemeso kali. Amena mate komatne abang le thanthe pulote badu tar echo ahem along kethe kiding, Jayaprana aphan recho kethe aso pu tinte un’e.

Amena asopo aphan te kepamupik, Jayaprana aphan recho akele inghonpik. Laso apot si recho alangphan—‘pi arje po arje kilit arta lo, piso some en ra rat det kachari asai nangcherapdun nangpo’ pu kaike ta ningjekong lo. Bonta amena aphi aphrang alam chematha’et amat Jayaprana ke recho alam arju pusita lapu’an ardi pipedet ra apor padambom.

Layonsari pu arje abon, aning angthin kemepi inut a’okrjang aphan joijoi pen Jayaprana aning kedok do. Lasi abatai batai recho alangphan ano kepaso’ang ajok, isi apor ke laso alam dipde sopse ra recho aphan thandak lo. Jayaprana aning kedok kehang ateng pen recho Layonsari aphan api apo akengri dampi si hangpidam retpidam ra arong bohong pen pangri pangdon lo.

Jayaprana pen kapangri pangdon aphrang, ephongbak ta Layonsari aphan recho ke thek longlepinlang. Amohor kangjang chilo ason atur kedo benban Layaonsari aphan adunghet pen ketheklongjong recho aning kamatha prekdak nangman tanglo.Alang kamatha—‘ ne det angkang arlo lapu’an keme kangjang animso pirthe hacheji pu ne komantune ta nepok neningne. Lasonson apun achak kechok a’okarjang aphan ke ne sonson, recho kethe ahem hemphipi kepacho si akele kachelonji apot lo! Bonta, non ke neban nesot benban Jayaprana pen si Layonsari kachepachor kacheparup? Kopuson si ne inut recho ketheset le laso akeme akechok kelangdunding unpo?’

Recho aning arlo lahei kaheno kamatha kilutchok ajok pangri pangdon arni amat si kopine abidi kevei klem ra kapatoradutji pu recho bor’ipiklang. Bonta achakri achakor atum inut ethe, inut ethang pen padok palang amat recho aphan ajat akaheno pachoklem re pangri pangdon amei pakhamkhe longledet .

Recho ahem along amat si Jayaprana pen Layonsari atum aphan kepado kepathak. Aning ingsamjin pen latum penanso ta dodun thakdun mate choklem chodamdun ra ajo arni padam lo. Alangtum bang hini aphan recho amena aso asonthot aning kachingsam lapen kanghon chadi pu si latum bang hini ta kachitin. Joijoi pen recho abang kopine kaheno alangtum aphan kamatha pu ke penanso ta apok aningne.

Jayaprana aphan seiphlot ra apiso mate Layonsari aphan kacheraidet aning pen recho isi bidi langno tevar lo. ‘Terima’ pu isi ahavar arlo isi kheiso atum recho aphuthak aning kangsamse ajok ron mai kachisik dobom lo. Laso kepame kapangsam damji aphan nang non amat ‘Terima’palevek nangji pu ra recho Jayaprana aphan pinkhat lo. Recho aning alam Jayaprana mate apiso Layonsari ke chinine. Lapu anset alam apot non amat kedam si kechok pu matha amat Jayaprana penang’an armu okso chepon si Terima ahavar pale lo. Bonta kpijilang? Aphrang pen kisiktang ateng pen ‘ I Saungalling’ pu inut recho amonit si haladak kelejong Jayaprana aphan apok along nokjir pen chutsopsop ra apran amui endet lo. Manghu meme, Jayaprana achethe kachivungjong Bali adet asining angkang the bi sining kangder lapen tomon arve kethe lapen herei keklo ahir kangtangso kali.

Jayaprana thang apap ave ado ave pen kithinang ahut kangder laso asining mate tomon arve keklo ahir kangtangjot theklong si arleng kesarsar atum ke – ‘det arlo prapjin pen kopine thedung tikuk temang nangcheklangpo’ pu ningjephrai lo.

Jayaprana apran amui dam’et lo pu abirta isi apor ke recho along nangle lo. Layonsari ta apenan kithi abirta kelongjong aning kiduk ajok kachiru chetongvok lo. Laso ahut si kepadok mate aning kepangtang alam kethandam pu ra Layonsari kedo kethak angdeng arlo recho lutdam lo lapen kacholangremji aphan recho bor’i lo.

Aning angthin kangthir’et mate apenan aphan kachinghonpik Layonsari abang pirthe alam kachiniji apor nangpikpedet lo. Recho aning angthin kachinijong bidi kre hini klem ra Layonsari amena a’ok kachepajok lo.

Pirthe athak monit atum kachetheklong tekleng ke mepikpak bonta aning angthin kachinidak sungkrung lapen lapuson pap pun keplengsop apirthe dodun ta ale ave pu matha si ha kapadu ke Layonsari amena apran che’en si Arnam arong damjui lo.

Apenan lapen Layonsari kithinang ke alang pap kachomatha ajok lo pu recho chini pame. Alang chakri chskor atum ta laso alam chini. Layonsari kithitang bang arpum ketheklong pen recho aning thuput lo lapen isi apor ke recho ta amena apran che’endet lo. Laso alam pen det arlo thedung hori homan do lo. Recho kaheno kachomatha along kachedondun mate kacherapdun atum pen mesen kamatha atum angbong kacharvo ta ahir ingtangparpik lo. Laso kacharvo pen Bali adet amonit penang kithi kejang do lo.

Lasi don atum, ove odon ahut pu ra ning chedok chehang amen pen emena angbong kachelang kachilu selet, ningso ninghi heihu kavedet nangji apharman ilitum ardi pi pamesen ra matha nangji. Pupete, Bali adet arecho ason ilitum adet, ilitum akhei angbong ta kacheklangrok ke kamanghu meme alam kali. Jayaprana lapen Layonsari atum ason apap ado ave, aning angthin klar’et klarsap pen kachoboche kachongtung ahemtun ahemtang, mek liplap angbong kanahokhedet ta kethe’o alam kali. Laso atomoso ilitum akhei a’ove odon atum aphan isi kamunthi angkung pamannang! Lapu’an ning kethe pen .

*******