chum ohang'ok atomo

CHUM PHANG’OK ATOMO

Kapangrum abang-Bamonpo

Songsar recho asomar bang hini. Chum lapen Phang’ok. Pirthe athak mindar athak, atur angtang, kichum kePhang’ok arpu ke apo Songsar recho latum bang hini aphuthak si soivet lo. Bonta latum bang hini angbong komat abang si ketheknei kerenei kangtangnei kangsaknei, apun achak kechoknei ma pu alam pen kaike ta kacharvo dover. Apo Songsar recho laso aphuthak kelang pangthekdun ajir dingpik lo. Asomar kachervosai kelangdun selet mate kangsaiji apharman la si Songsar recho isi abidi tevar lo. Asomar aphan adung chehang si Songsar recho pu lo—

Pomarli atum! Nangtum bang hini angbong pen komat abang si ketheknei kerenei, kangtangnei kangsaknei mate apun achak kechoknei ma, ne nangpangthek thekthedet lo. Apot si nangtum bang hini ta pirthe athak mindar athak damtha. Haladak kedo monit monor mate ason kaprek kaprek api si nangtum bang hini angbong pen kemenei kechoknei komat ma bang nagthandunpo. Laso alam tinidet aphi le nangtum puthot songsar bangsar nangcherapthunon.

Apo kapinkhat kapinlar ateng si Chum lapen Phang’ok bang hini ta monit monor anangcheparjan si pirthe athak mindar athak kaprek kaprek alongri alongphang kahumri kahumpat nangpangcheng lo.

Arnisi ke Chum Phang’ok atum isi ramso amanduban adung koiponkut atovar kedongkri kengkeng dambom. Manduban adung kelejong komatne arloso ove alun kilun pangdukjin latum bang hini ta arjulong rinti lo. Ase kelangpi laso alun karjulong pen ta ning varjet. Majok le laso alun lun sitame kilun abangphi aphan langdamnang pu ra Chum pen Phang’ok atum adung patebokdam lo. Latum kethekdamlong ke inut aphu kethom kachetongchom asarpi aphan. Aphu chu kelok doiphlan amek ave ano ave laso asarpi amohor angkang aning kiduk aning ke’oi angthek thang ta ave. La’an le ramso amandu along laso asarpi inutvet kopu si kedothek ma pu ra Chum pen Phang’ok bang hini ta kamanghu amahang chelangphrong lo.

Chum pen Phang’ok sarpi aphan kangki pangcheng lo—

“ Phi! Phi! Netum aphan nangchini ma?”

“ Mai, nemek ta ave neno ta ave ti ho po atum , ne ke nangchininedet lo, komat atum ma nangchethannon! To ingni rinti tha”— tarbeng achet pachonlok si sarpi Chum Phang’ok aphan pu lo. Sarpi kepachon atarbeng athak Chum Phang’ok kortete ta ingni pame si thakdun lo—

“ E phi netum ke ha heloving pen si kevang ho. Netum ta nangsumar ason lo. La’an ramso ajo, manduban along nang lun kilun nangse jume’ong si komatne a’okarjangbon pu rinkok lo netum ke.”Risomar atum alangphan okarjang pu kitin alam pen sarpi ingnekkhuk. Sarpi puthu lo—

“Pini lone penap lone chipu thekthe alamchot lo po atum, ne ke nerong kachechar lo , bonta ne’okarjang ako kilun alun si kachilunthu lo.”

“ Nangning kedok arisomar arje mepik a’otdo le phi!”— Chum Phang’ok atum chepatardun lo.

“Kalang te ma ti asumar, lasi ne ta kedo lole.”—sarpi alam karjulong pen Chum Phang’ok kortete ta ingnekdun lo.

Kopi athe si alang inutvet le ramso amandu along nangkedo nangkok ma lapen konat pen si jopadap kecholongma pu Chum pen Phang’ok sarpi aphan arju lo. Sarpi kachethakdun—

“ E po atum, ne ke nemek le kedo kali, neno le kedo kali. Nesomar nesumar along hem dodunkok sita klemdun thekthe damdun thekthe. Thangbakbe kecho chonghongdunlok ra kapasiksakdun nening hanghe. Lasi nesumar atum nephan ladak nethonkok.

“ Nangphan hem nangkechakche apot nangning oi’e ma phi!.” Chum Phang’ok atum sarpi aphan arjuthu lo.

“ Ke’oiji athe amat si avedet, jopadap kechoji kijunji aphan bang hanbor anbor nethonver. Pe ri, lang me kopi ma kenangji neripi apot ne thang matha sung nangne. Ne ke ladak si nekai chepajangpo po atum. Rong damde lo.”

Non ephong ke Chum lapen Phang’ok atum kemanglor pen pirthe nanghir ra kevang athe kepatiniji pu ra sarpi aphan arju lo.

“ Phi! Netum ta nangsumar ason lo. Eson alam. Nang’arju te nangning oilakji ma?”

“ Mai po atum pi alam mati ho? Lamthe kacherjuchot le pi si ning ke’oiji ma!”— ase chepangsamjin pen sarpi thakdun lo.

“ Te, phi, nang putha, pirthe athak mindar athak, kichum kangsam ahut si kedo kethak karengme ma, mate kephang’ok ahut si kerengme lo?”

“ Mai asumar! Kichum lapen kaPhang’ok ke monit atum le kapinchongvongvong alam akam kalidet le. Monit monor pen danglok pirthe athak ajat api aphan rengdok rengni pen kepadoji apharman si Arnam atum kichum lapen kePhang’ok kethak lo. Kichum ahut le karengmemedetjilang ma— phong thengmi chepatongkring nangpo, mehip chekommit ok nuphi somkrei nangpo, ok nuphi, ingti nempo pen hor alang kijun ke karengmepik alam lo…” Ningkreng kichum ahut kopipi keklem, kecho kijun lapen kopusonson kedo kethak ra kacheparengme alam’an sarpi than pajirmi ra Chum kangsam abotor aphan un’an ro lo. Lapuson thakthak si kephan’ok apor apharmann ta pu lo— kephang’ok apor ta rengmepik. Kephang’ok ahut ke katiki kanghoi apor. Arve nangjangpo, ason ason asai klempo, mo lak lo pulote ning arong pen chopo, junpo….., karengmeso kali. Nesonson akesar atum ke ajo hong kangsam along tarso ahi limjir athak, phong…. asomar asumar aphan hijap japvir ra ason ason atomo kachethan ta laso apor helo. Lahelo po atum kichum ta me’o lapen kephang’ok ta me’o.” aphu kethom kachetongchom asarpi lapu’an aning keme, alangtum bang hini aphan kasorsa ke aphi alam lo, lapu’an kachoro apot Chum pen Phang’ok bang hini ta aning ingsampikpak lo. Ahokpet ke bang hini ta amena mena akam along ke thereplo pu alam ta chichini pame lo.

Lapu’an aning keme pen alangtum bang hini aphan lamthe kethanthek apot kopine mesen ahormu esonbak kepajir tekanglokji aphan Chum lapen Phang’ok atum aning hang rinti lo. Lasi bang hini chingvai chingsai pame lo. Lasi vutphuphu amat laso asarpi aphan amek ano kepamechot lapu kali arje abon ta pharlo si puthot okarjang pamanthudet lo. Amek ano chchardet aphi alang Chum pen Phang’ok aphan theklongtantun lo lapen ahokpet ke komat ma lapen konat pen si kevang ma pu arju lo. Chum pen Phang’ok ta amena alam mate ha Songsar bangsar pen si kevang pu sarpi mate nonjong arje kachikirla a’okarjang aphan chethan lo. Arnam arni aso si alangphan pini puthot kai arje amungmang mate jakong horang kipithu apot Chum Phang’ok aphan okarjang aning kangsam pen ari hongni pacherop ra kardom amek selokchit anatlang , thivin thevan Chum Phang’ok atum abang ave’et lo. Laso aphi okarjang ta aning arong pen hem chevang lo. Arnam akanghon pen aphi kepa’okarjangthu alam pen asumar atum aning arongpikpak lo.

Labangso alam bonta lam patu manmedet lo. Inut moichingki moichinghum arta asarpi le Arnam arni akanghon pen puthot kepa’okarjangthu alam chethanchet chethanchet amat ha aphi’an ke chetakphlup lo.

Laso asarpi asonthot akaprek ahem ta inut akele kesarpik asarpi do. Sarpi asumar atum ta amena aphi aphan ha rit aram amandu along kachethondam alam chingvai rinti lo lapen isi apor ke asarpi aning hanghe sitame rungpon bor’idet ra ramso amandu along thondamkok lo.

“ Bang lapu pu aling lo, la,an le nephan ramso ajo nekethonti” pu ra laso asarpi ke aning kejangje, ke’oi kanglit pen asomar asumar aphan kangton ame pavanglap anpin. Asumar atum ke bonta arju vangve. Thontidam bor’idet. Hem kachevang le kethek ta kali, ingsali! Laso asarpi bang ke asai jokje ramso amandu along chiru cherhe ra dobom lo. Jopadap an kethondam ahuthut asumar atum aphan laso asarpi bang kangton aphi aphu arong pachecharlap titi.

Non inut asarpi aphrang asonthot ramso amandu along nangdo lelo pu alam Chum Phang’ok atum chini si songsar pen nanghirthu lelo. Chenam ta chenam labangso asarpi ta manduban along si amekkri anap kra manduban along to kachiru kacherhe. Akele kachiru kacherhe ahir kedojot thekdamlong mate arjulong si Chum Phang’ok atum ke sarpi adung petdam lo. Laso ahut sarpi aning kipungso kali. Jatnon, kopi athe si manduban arlo le kachiru kacherhe veret ma phi, pu Chum Phan’ok atum chorjudamchek.

Laso ase karjulong pen sarpi aning kithi litmusi. Neso nesu thekthe’ong ra badu ahi’i aso Arnam aso ta nedung nangpatebokdet ri pu sarpi un’an hang ra chechek lo. Kichum ahut si rengme ma kaphang’ok ahut si karengme pu kachorju ta avive si thak. Laso asarpi srdeng kethakdun ke lapu helo—

“ kiduk pu tangdet le kichum ahut ta rengmeme lapen kePhang’ok ahut ta rengmeme lo. Komat ma,ne ingno vang ra nening nangpasiksakdetri, ingbonon, chetarnon.” Sarpi lapu’an kisik kasedeng lapen angho kajuno mate aning kaheno theklong si Chum Phang’ok kortete ta chelangphrong lo lapen aning kejangje amat kachechar parim param amek ta vut tekangphuphu amat paheno tekanglap ra ha sining angsong mate apo songsar recho along chedamruk lo.

Songsar lerok Chum Phang’ok atum pirthe athak alangtum kevang pen nangkepho alammo’an angton pen chethanphlir lo lapen alangtum bang hini ta amena mena akam ajam along chetherep pu sarpi ningme kethandun alam chethandam rinti lo. Asomar lahei alam kachethandam apot Songsar recho ta aning arongpik lo. Songsar recho lasi asomar atum aphan pu lo—

“ Po atum! mo sining longle ruhuphetik, sorjon sorji amoton pen virlapletik nangtum bang hini ke non ason thakthak Chum Arnam Phang’ok Arnam cheman ra sining angsong le dovernon. Monit monor angbong chervo chingchek do thomkep sita kedo kethak chekak nangne, inut sedengkak pulote inut bang aning dingmuchot nangpo. Laso angthek nangtum sining athak amat le chepaklangnon.laso angthek aphan nangtum sining angsong pen purthimi kihir atovar mate ‘Chum Phang’ok atovar’ pu le monit monor atum botor nangpachethan lonang.

Halaso arni halaso akai ahut pen si botor bokan kemesen aningve pulote itum sining angsong Chum Phang’ok atovar kethek longlong. Isi dingchet isi thichet ongdung chikloso chingrum ra kacheman laso atovar sining angsong nitur anat pen nijang anat hingkri si keklangklng.

Bong marli atum! ining kejangje thektik ahut, sining abngsong kejengkrikra aphan langplak ra ining kachepajon’i ke kemeparik alam kali ma?

********