ANTONY LAPEN CLEOPATRA

Atiri :- William Shakespeare

Mena alamthe pen ketokthu:- Sikari Tisso

Cleopatra arje abon keme kangjang aphuthak pirthe angkang thebi ke’ongdung tok bangphu bangphi atum, amena mena alam pen penang’an tok pajirmi ra amena mena alammet lamchong boche lapen chepangcho rinti lo.Cleopatra inut kemanghu meme a’ot adur pen pirthe kehon arloso. Aning kehang pulote badu apinso aphan sitame adung’an chepondet ra kopi ma vi thek. Kopi alambei alamdoktong alanglong kedo lone badu ta chini dunde.Monit atum kachethan ateng pulote alanglong lapuson kapheremtang alang si kedo; laso alang kijun ajok alang akai dingpi ta panimsover. Arta ateng pen aphi’ong sar’ong alar aphi’ong panimso ingdukthu’ong mate arje abon keme litthu’ong si kacheman. Kecho kijun amei pha ra ajirpi jirpo atum pen kaike arong bohong pen kedo, kachelem kachikurtu helo Cleopatra aning kehangnei akam.

Ke’ongdung phurkimo kuru atum ke Cleopatra aphan inut, amena apharman kachemathalok lapen aning kelangnopik abangpi pu si kipudam. Ajat le chethannon, Cleopatra ke inut manghumeme a’ot adur abangphi penak pu angthek ke klangdak binong . Pirthe kehontik ahokpet pen Cleopatra aning kehang ason kopi ma pu chini kangtung pen ketarlip atum nonpu ta dobomlang.

Egypt adet arechopi Cleopatra; a’ot adur me punon mate heno punon eson alam pen ke chorovek nangji. Amena arat adet keme kechok lapen rengdok rengni apharman amena jongjung a’ok avi aman ajot kachejor aphan alang, mo! pupe.

Halaso ahut Roman adet helo pirthe athak kedosar adet angbong keplangnei kiphine . ‘Roman legion’ mate Roman armu okso asong aphan halaso ahut kachohai’un abang ave. Kereparpik Egypt adet arechopi Cleopatra laso alam chini pame. Bidi suri pen pusitame Roman legion asongjapo atum pen alang chepajirpodung. Rome pen kaike ta kemerapsenji aphan si alang kabor’i.

Julius Caesar Roman legion asongjapo kemantik ahut ta alang Julius pen che pamepik. Mesen jirpi jirpo si kaike ta kachekam. Laso apot si pirthe nahok adet tengkhenglir ra cherailap pusitame Egypt aphan nokbe Julius Caesar kelang pakengding. Katengkhengji amen amun ta en’e.

Hotur atum arideng nokbe Julius Caesar apran amui damjui aphi ke Inut thirklung thirklak mate chikiklong asongjapo mate chari chalom abangphu kavedet ajok Roman rongsopi lapen adet amonit angbong katortar thedung lo. Egypt pen Chedailap laso adet angbong arnivang kopusonson alam si keklang ma lapen laso along pen amena adet katoradun ke aphi alam lo; laso alar kopine thedung ale kelongdun nangji apharman si Cleopatra kaike amat cheroktok. Roman adet arlo kachervo, hori homan dodet pen haladak chepahai ra kachari anghoi kangnilong, Roman legion asongjapo atum pen kachemeji avarsailok si Cleopatra ke kiri.

Julius Caesar thilot aphi alam. Ha bihek ako pen Julius Caesar kacho’ora pon a’oso; Octavius- ajirpo Lepidus lapen Mark Antony pen armu okso asai choklem dun raprap lo.Caesar aphan pathilot aphi Rome pen kekatruk Senate apinpo Brutus lapen Cassius si hala esong armu okso asongja cho rinti lo. Philippi pu isi adim along kerem chedan ra kerem kehai chepatini lonang pu ra pasongni a Roman armu okso atum arni chehot lo. Laso adim along si alang kachinghonnei asongjapo Julius Caesar aphan aron damde pen kepathi abangphu, Brutus, Cassius lapen ari sangho do’an aphan pathilir ra kepangsamriji aphan arni ke’ong pen Antony kachisik.

Phlilippi along Roman armu okso pasongni angbong ron kachedan, nini nithom aphrang aphrang alam. Brutus ahem arlo. Ajo apor. Melur do benset sita atur khelanparpe.Ihin anatthu ke binrim, ingtingsang. Roman hejan asai jokje pen ron kachedan nangkok apot laso ale ke Roman akhei aphan amat si mononphi kanahok the’opo pu heihu matha patibitdam ra Brutus amena angdeng arlo dojoi. Laso ahut Brutus kangnilun adim pen chechardet akaprek angdeng, kangtingrim along komatne keng’op chethon ra—‘ khrop,khrop’ pu alanghin kevangbon arki do lo. Arki kedo anat Brutus angphun chingthur si langding.Thek longle, badu aphan ta thek longle. Laso kethek longledet apot Brutus kamatha kopine aning dorik ason si chethek long. Menmen kopine kisungkrung angring long si Brutus avam chepherei ra ahom arlo pen nokjir chesan lo lapen arki kedo anat puthot lang si hang lo----

“ Komat lo la? Ne ingno pi si vangvedet? Nangcheklang ra nangmahang nagchepaklang sipotlobo!” Brutus alamthe kijutjong inut amonit abin along pen nangthakdun lo

“ Ne ti ho !”. Ase patheklong ra komatne nangthakdun. Malomso aphi ke laso amonit abin pen nangchon si Brutus angno nagcheklangham lo. Brutus laphan lang lo lapen manhuhak lo. Athe, laso amonit ke badu kali! Arnisihet Capitol along alangtum apran amui ke’entang songjapo Julius Caesar penak! Arje abon, ajon kiding kithi, akengkam kekam heihu, angton pen chinglitlap. Kaike kachingkisai asongjapo Julius Caesar kali pu adim avepin. Ase arno ta pu thakthak! Ape ari ta prekpre! Kepathi arni kachingthang ape ari si non ta nangkachingthang. Ape along vi kereng ta bon’ang‘unglang. Menmen ajat mathatong thekthe si Brutus ke amahang iksip ra siringding lo. Angphun chingthur ra puthot kelangdun ke laso monit thivin thivan ra abang ave’et lo. Akangting ajo pen laso amonit kehang tekang------ “ Philippi along chetongnang dei!” Laso thivin thivan amek hini pen kethek long puchot kali, ‘mo chetongnang’ pu kehang tekang ano hini pen ta arju longlor. Laso aphi ke Brutus ta kaphere apharlo ingjarchor lo. Kopi keklem si kemeji ma alang tongselo ke matha thekthedet lo.

Apharlo mate abang kereng ajat ta tinine pusitame laso aningve thivin thivan Julius Caesar aphan kethek long aphrang’an ke-----‘ Julius aphan apran amui ke’en thekrei ke Rome rongsopi, Roman akhei lapen Roman adet aphan apun achak kechok thektik akam lo’ pu si Btutus kamatha. Bonta laso aphi pen ke aning arlo kaphereso lutchok ason si chethek long. Kamatha ta kachelar nangdo tanglo.-- ‘Julius apran amui ke’en ahut alang helo ke’ot paphrangsi abang. Alang le ot paphrangphre ason te akaprek atum ke patengkai haihedetji mene! Julius ta thithedetji mene! Laso akam alang keklemdet apot Roman akhei puchot kali pirthe amonit si alngphan mantune arni sita dijajedetpo, la ke ahok alam. Pirthe aphurkimo aphar along isi anongno alangmen pen tokvokpo. Laphan kepapreidak akhemeta alnglong pini ave. alanglongdet le kave lapu kali, badu along ta ave---’ Brutus non kamatha kisung chadi lo. Philippi aron along alang kejapon a legion atum Antony, Octavius lapen Lepidus atum kejapon a legion aphan kachohai undetji ta thekra ma pu alam alangning arlo lut tanglo. Lahei kamathabom ahut Brutus abang bithe chephoroi lo. Puthot ingdeng isi kapehere aning arlo nanglut tanglelo. Alang kachethek long---- ‘amena ari akeng mate abang bithe ta herei athan ason ingsamklak, kithiiang arpum kachekeng asonthot. Brutus aning kamatha aphi’ong run’ong lo. Philippi aron aphrang aphrang lapupu asongjapo atum elong adim chepha ra ingnichen si parsikjik pen isi kachingvai padothulang. Chingvai chingsai pen chepame chepangsam thek pulote khei hejan angbong ron mai do ra avi aphik chepabu jokphlotpo. Khi dat ta chepanahok jokphlotpo pu si lapupu asongjapo atum ta kamatha rinti. Bonta lam kejoi! badu alam badu ta arju thekthe. Ron mai dovek nangkokpo! Mei pratphun lo.

Ron chedande aphrang, Brutus abang Julius aphan abang kereng lone apharlo lone thek longlok aphi ke kamatha kisung pen aning run’et lo. Cassius ta pu thakthak lo. Arnisi, chodet jundet aphi malomso kesang pu amek dammei anatlang; kopitong kethek longlok lone kaphere a’ok chihijirphratphrat, areng angmi thurphrok. Kopine kaheno angthek kethek long ajok Cassius ta kamatha nangrun tanglo. Philippi aron along amena armu okso atum kehidun pupedet si apran amui kejokji apharman’an ta kachematha sungkrung tanglo. Bonta Octavius lapen Antony atum ke lapu kali. Jat chethannon, Philippi aron ke alangtum si haivekji pu aning theklong. Isi athe aveve alam aphan lam paman ra bidi kanglim pen khei asongjapo binog mate nokbe Julius Caesar aphan Brutus atum apran amui ke’endet apot, alar hui longvek nangji pu alam si Mark Antony aphu mate aning arlo lutchok. Laso kamatha aning arlo kedokok ajok alang badu ahotur aphan ta kaphere ave. Non ephong ke lahei alam api alo patinivekji pu amat alang ron mai ajo arni aphan chisik pame ra inghongding.

Kehot ateng pen ron ajo arni nangle lo. Philippi along pasongni a Roman legion angbong ron dodut lo, bonta abe kidun ke’ongparpik; Mark Antony, Octavius lapen Lepidus atum kejapon a armu okso angno Brutus atum asong ajak kiding cherchak un’e si kidik kidak, longkhun longkhan man lo. Kodak komat arideng komat si apran amui kedam lone abirta kache’enji apor badu along ta ave. Pupe benbe Mark Antoy, Octavius lapen Lepidus atum arideng Brutus, Cassius lapen ke’ongdung ari sangho atum apran amui damnangjap. Brutus kithitang arpum adung arjaplun ra Mark Antony ajirpo atum angno lapuson si kaningje---

“Langtha jirpo atum, lahelo jo itum ahotur Brutus kithitang abang arpum.Brutus itum ahotur, kalangvek, bonta isi alam ke itum kroivek nangji. Ahokpet ke Roman akhei do’an amonit angbong pen Brutus ta inut kemenei amonit pu ta monit atum chethan . Akai dingpi alang Rome lapen Roman akhei keme kechok apharman si kamatha lapen keklem. Bidi kevei keklem atum along asai jokje si alang lam ki chedon dun ndngkok lapen nokbe Julius aphan apran amui ennangkok. Julius aphan apran ke’en ke Rome rongsopi lapen Roman akhei aphan kahenodak pu alang matha duntong thekthedet. Ajatnon alangphan ta itum ining chibi pon nangji.”

Phillipi aron ke Antony atum si hai pame lo lapen laso aron aphi Rome rongsopi, Roman akhei lapen adet a chari chalom aron nangprekdak lo. Nokbe Julius Caesar akengbot along amena akengbot chibidun ra kengkam kekam, Mark Antony, Julius kachopathe aso - Octavius lapen Lepidus; latum bang kethom si kai ateng kai amang Roman legion kapangtang arpu en pon lo. Adang ketheparpik Roman adet kachari arpu ta latum adeng chepekkrep lo. Europe anijang anat ahavar hapat do’an kachari arpu ke Octavius aphuthak, Europe anihang lapen longle achete pu ahavar ke Mark Antony aphuthak lapen Africa ahvar kachari arpu ke Lepidus aphutahk si do lo. Bonta Egypt adet alam abang jerso prekchet. Laso adet ta Roman adet arlo si do benset pusitame ladak achari chalom aron atang kaprek pen chingbarbe. Amena amat isi angdeng’an kachechari ajakong latum aphan aphrang Julius Caesar akai ahut pen ta dokok. Africa arlo le do pusitame laso adet akangtui angdeng kelang arpu ke Mark Antony arideng si dokok lo. Adang le bihek pusitame Nile pu alangroipi akungkung karchi karchon adim keme’o ajok si Egypt adet ardi ke Afrika adang kedo kaprek kaprek adim pen jerso prekchot.

Roman achari chalom arum le dodunkok pusitame haladak aechopi, Cleoptra, abang akele kereparpik ajok laso adet along Roman legion mate Roman adet chari chalom anghoi kangni atum menmen ke ajat ta nangklem longle. Amena amat amena aphan kachechari ajakong ke rechopi Cleopatra chekhang dunthip. Mark Antony aphuthak si Europe anihang lapen Egypt kachari arpu ketang pu abirta kelongjong kopipi si kkeklem nangjima, Cleopatra ke chisik’et lo. Amena arje abon lapen alambei pen Antony aphan beidet ra rat aso rengdok rengni puchot kali laphan apar aning kehang ason le do pute kepachok kepaplengji apharman si rechopi Cleopatra ke kemang.

Kachetongcheng arni amat si rechopi Cleopatra, Mark Antony aphan beidet. Talopi alang athak ihum ser rup ketopkling ahum kethepi atelong athak si rechopi Cleopatra Mark Antony aphan kachetong lapen kiru kethai. Rechopi Cleopatra lapen Mark Antony kachethap atelong ke ke’ongdung amonit atum kithip acheng, kivut pongsi muri haeihu angdi angdi pen si sori boitha kangvui mate kevek. Telong thepo arlo Mark Antony aphan eson angnim kanemprupi alng si kapachinglu. Kang’ar areng chechardet ape ari heihu si laso arni Cleopatra kachingthang lapen kachingki kachingvai kecho kijun esek kopipitong rechopi Cleopatra keklem lone pudun thekthe, bonta laso arni pen amat Cleopetr adung pen Antony cheterek thekthedet. Mark laso ahut amena aphan inut ningkan ingkoi ra pho arta ariso kangduk lapen Cleopatra aphan ke inut ningkan krepho kretherok animsotong kethek long lone pine badu ta pudun thekthedet. Halapu Rome rongsopi,amena ahem along kachetekangbup, arje abon kemekon,apiso Fulvia lapen asomar alam ke Mark Antony apok aningne. Rechopi Cleopatra apenan do ke do lo. Bonta ilitum aphan ke manghu meme alam. Athe halaso ahut Egypt adet aron ateng pen amena pi isi po isi achekle Ptolemi aphan si alang kedo. Ptolemi xiii laso ahut arta ningkan kep vetlang. Ron kedam ahut losei arot ahem pen chingthubop amat Ptolemi apran damjui. Laso aphi achekle lethot Ptolemi xiv aphan chedo lelo , bonta eson ethe amat laphan ta ha Syria adet arphlungphit. Roman asongjapo Mark Antony ta pirthe alam tingnelap amat jangphong aphik along bitu kachingnang ason Cleopatra alangphan aning kedok kehang pen ketot apham along chedanling ra dokok lo. Recho pulote recho, kethe pulote kethe. ‘Recho kethe atum ke pap choklemkle!’ pu alam do. Athe klem pusitame adin abo ke’enji abang komat lo? Lapuson ke chokche pu latum aphan kachpudunser ajakong komat along si kedopo? Apot si pangri pangdon aron atang ajat ave pusitame Antony lapen Cleopatra penanso ason dim klong pasi pen do parni thak parni lo. Roman legion aphan ahokpet atovar kethan pon, Roman arat punon Egypt arat punon lahei atum rengdok rengni apharman alam akam non malom Antony lapen Cleopatra, banghini ta arong lone arikang lone kachini apor ave. Puparpik kali recho punon kethe punon; ok vi, reng ingsi pen kamanvek amonit apot latum banghini ta thang kangtuiving alam matha thekthe lapen klem thekthedet lo. Amena a’ok avi aphan’an si latum chechini seroichot lo.

Rechopi Cleopatra ahem.

Mir biri arlo,arni ingsajin apor. Pirthe alam mathathe si Antony lapen Cleopatra atum banghini tomon kachophang pu ra kangthuklar ason ason mir achom adak adak akeng pen kedam kamkam kamkeke ra kijui. Latum bang hini aphan ketheklong ke kithurmi ariso nimso ason. Kopipi alamtong kachethan lone, kangnek kaningje. Laso ahut Rome rongsopi pen inut tekela Antony along’an kevang pu inut a ban nangthan lo. Rome pen Antony along’an inut atekela kevang pu karjulong pen Cleopatra ke arje chepharlophak. Kangnek kaningje aning karongchenpi a Cleopatra menmen aning kithi supong ason. Kangnek kaningje alar Antony aphan kelang ta amek charkuk ra mengpong ason. Cleopatra kamatha---‘ Antoy aphan apisone si nangkachepha lo. Kalite rat det kachari amo kopine kenangsot do pu ra Octavius Caesarne si nangkepha tahai.’ Aning chekhang un’e si Antony aphan alang karju----

“ ajerjerjarjar alam pen le lahei atum ha Rome rongsopi pen tekela nangtoi ra itum aphan ekapasiksak athe kopi ? Itum ladak kedorap kethakrap aphuthak aning angthin nangkesodun kali pu he?” alangning kehang alam akam along komatne keramphandun pu ke Cleopatra munset ta chechak un’e.

“ Pine sodak alam dokok ta hai,pupe te lapu’an kahelo pen tekela nangketoi akenagsot kopi lo?”-- klopleng achiklopi asonben kiphubong Cleopatra amahang langlor si Antony thakdun lo. Antny amohor along laso ahut kacheklang ke jerso kamatha kisung angthek.

“ Ajatnon kopi abirtatong tekela kevan lone arjudunlang pu Antony ningje lo lapen Cleopatra adung pen kithurjetji aphan matha lo. Antony alam karjulongjong Cleopatra ke aning kajangje amahang chepa’erdunchop. Cleopatra kipudunthu----

“ Itum bang hini ning chedok chehang, kechorap kijunrap, kedorap kethakrap pen anpar akethe alam pirthe athak kopi si kedonagji ma ti Antony? Antony! Malomsobak aphan ta nang nedung pen cheterekdetri! Nedung nangbang kave pu alam ne matha si un’e! Antony nang damdetri,vangnon, la akemepi nangri hongni pen un’an pachip ra nephan nebamtha, nangning akanghon do’an nephan nepitha!

“ Mai ne kachinghon arechopi! Nangdung pen ne cheterek ra damjuiji pu alam kopu si ne kamatha unpo ma ti? To nang punon laso atekela aphan panghongchetnang, mate chingki chingvai dunde ra Rome pachedamjuinang?” Aphi nagchelang si Cleopatra aphan Antony kiputhu.

Antony lapuson kangje karjulong pen Cleopatra aning ingsampik lo. Athe ma Antony aphan alng kemoi pen ko’an abit pajum unlo ma; laso asat ingdeng isi’an ke lang long lo. Lapuson abidi klem pen amena kar’i ason do’an kepachok helo Cleopatra aning kehang alam akam. Rome rongsopi along amena ahem arit apiso aso dokok pusitame aron damdepin pen si Antony ke Cleopatra aphan aning kachodok kachohang lapen kedo kethakdun. Alangphan Cleopatra ko’an chitisap pentong aning kedok kehang lone alang chichinine, bonta alang jongjung aphan kepasungkrungji alam ke Cleopatra mathathe klemkle. Muthe Antony pen kachepame, a’ok avi kachipi kachepachoi ale ke amena aser anghoi kaike ta ephong ateng thirklong thirklak ra dover nangji, lapuchot kali arat adet ta rengdokphun pen do long nangji pu aphan ke kaike ta Cleopatra mathakut. Cleopatra aning kamatha laso angkang pen angtan chonche. Alang lapusonlok si kamatha pu alam Antony ke chinine. Athepi alam, Antony aphan rechopi Cleopatra ke isi thedung arisim chividet lo.

“ Antony! nephan nang lapu’an si nangning nekedok nekehang pu alam chini si nening arongpik lo.” Laso ningjedet pen alang Antony aphan amahang langding ra ingnekhing lo. Laso akangnek aphi kopi asontong chepatujoi ra kedo lone Antony chichinine.

“ Thedung alam aphutak Rome pen birta kevan! Kopi akethedung alam lo? Pirthe athak nang pen ne ining chedok chehang anpar akethe alam kopi si kedopotang?” Antony aphan inut thekser reset anokbe,Julius Caesar apateng chale karjap abang pu Roman arat angbong anong athang kachethang do. Bonta kethek thomkep kere thomkep lapen jakong horang kangtang thektik laso ron apinpo Mark Antony pini ke lapuson si ningjerong ! Alir acham avepin alam; pini ke alang Cleopatra arisim chemandet lo. Cleopatr le nichi pen si arni kevang pu le than sitame kekroidun pen anpar ethebak alam pen kahilidun ajakong Egypt arongbong Alexendria rongsopi asamepi ajo chepangbodet lo.

Rome pen kopine kesodak alam dovek si do pu Cleopatra chini,bonta kopi alam lone la ke chinine. Laso alam chini dunvek nangji pu Clepopetra matha lo. Rome rongsopi pen ajat kesodak abirta nanglenonon nanglelenon Antony aphan alang arideng pen lole lapen alang hukum hora ateng si kibiverji pu si Cleopatra mathathip si kedo. Lapuson aning kehang aling keklem along badu akakhamkhe ta Cleopatra chechakche. Lasi kiru aling kemang aling ta kam kechokche pu non damtang’an alang chethek longlelang. Non ephong ta aning kehang ateng pen kaepachokji aphan si alang Antony aphan arideng pen padam longlodet lo. Antony aphan lahelo alang kipu------

“ Nephan nang akele nangchinohpik pu ke ne chini. Rome mate Roman arat adet aphan ta lapu hthakthak lo. Lasi lahei apharman kopi ma nangpadeng kam kedo lake nang klemvek nangkokpo. Da damnon da. Ha Rome rongsopi pen lapu’an akahelo nangphan kahumri ra kevang nang tekela aphan chetong ra pirthe abirta en damnon da!”

“ Damji, ne birta endamji,bonta nanglam pen si ne damchotji . Nang le chetong nangne pulote Rome pen thekthe’ong ra pirthe nahok adet pen kevang atekela pen tame ne chetongte. Antony alangdung pen cheterekji pu ahut ase pabihek mate Antony parjulongchit ra Cleopatra kaningje--- “ O Arnam! Rome rongsopi pen thangnat abirta kaheno ta nangpaledetri! Ne kachinghonnei abangpo mate Antony aphan nedung pen terek ponjuina! Antony le nelong pen cheterekjui pulote ne inutvet ke pirthe hon thekthe.”

Bahari alam keso si tekela ke Rome pen kevan. Antony apiso Fulvia si a’ik pen chelang amat joijoi pen Octavius aphan thedung kaheno choklemdut. Tekela pen Antony kachingkibom ahut anut kaprek atekela apai Rome pen vang si nagledun lelo. Antony apiso Fulvia apran dam’et lo pu si non ephong ke birta nangkele. Rome rongsopi lahei alam pen kluk set kedo ahut si akan keme ahut keberdun pu ra kithitang Pompey pu ahotur asopo(amen Pompey pu lethot) abang ke’ongdung armu okso chevan si Rome rongsopi katengkhengji nangchingtonring tanglo. Lahei alam munthilap pen--- ‘ Ne non amat Rome chedam nangpo. Pirthe alam bikok si Octavius atum pen chelang ra Rome rongsopi cheraivek nangji. Pompey asopo Pompey aphan paremvek nangji!’ pu Antony matha lo.

Rome pen kelong abirta do’an Cleopatra aphan Antony thanlap lo. Alang non amat Rome chedam si lahei kesotet alam pame pangsamdam nangji pu ta than lo. Alangdung pen Antony aphan Cleopatra ke pacheterek ingtungte bonta pacheterekre te chokche. Athe ma ladak Rome rongsopi aphan kerai nangji alam dokok. Rome le kiru lo pulote Roman akhei lapen adet si kiru lo. Laso along Egypt ta non ateng rengdok rengni do longledetpo. Chethan aling ta alang Antony pen chekak nangkokpo. Alanglong pen Antony kedamjui ke Cleopatra aning kehang akam kali. Lahei alam pen Cleopatra aning oise cheman lo.

“ Antony! Kopu si nang nephan nechekak tekangbup ra Rome kachedamjuipo ma ti? Kachetongcheng ahut itum kachechak raprap alam kopu si nang ke katingni;et lo ma ti? Lapu’an ning arong bohong,chedok chingsam pen ili kedo raprap alam nang tingnelap lo ma Antony!”

“ Asaimo jokje si ne nanglong pen kacheterek Cleopatra! Non ne kedamji ahut nang lahei alam ningje ra nening nangpa’oi dunrinon Cleopatra! Itum le chekakdak pusitame ne nangphan nangtingnene. Nahok le do pusitame ne kaike ta nanglam si mathaji. Langnon itum amononphi alam dokok, ne damde te chokce, nang ta chini. Lamchak nangpikangthu lo- prapjin pen ne nanglong vangthuvekji.” Cleopatra pen kachekak ahut Antony aning oise. Aphu phuphrangjang ra si’urlak anpin.

Antony anat langding si Cleopatra puthot kipudunthu—

“ Chedamnon, Antony! nang chedamnon! Konat pen ma kevang haladakthot chedamnon! Eson ethe pathe si nang pini nelong pen kacheterek lo. Ne si kilu lo. Ne nangphan ko’an ma ning nangkedok nangkehang, lapu’an si nang ta nangning nangkedok nangkehang pu si ne kamatha,bonta lapu kalibon!”

“ Do’an alam nang ta chini lo, Cleopatra! Ne damde te chokche. Nang pen chekakdak ra malomsobak kedo alam ne matha un’e. Prapjin pen ne nanglong vangthupo, ning oidetri..” Cleopatra aphan aphu aphang phoroi tekang ra padok amat Cleopatra adung pen Antony cheterekjui lo. Kachekak aphrang aphrang puthot alanglong vangvekji pu abatai batai lamchak kachipi tekang ke amena aphan ko’an kemepone mate kahenopone Antony kachiputhek ajakong konattong kachepangbo lone mat lo kipudun thekpo? Antony pen kopi ma kelong nangji ason do’an long pame si Antony aphan damme jume kachepadidunlong apot arlo arlo ke Cleopatra aning kangsamso kali.

Antony kedam anat amek pen checharduntik angphun chetevarvepin pen Cleopatra langdun lo. Antony ta abatai batai angphun chetevar si Cleopatra aphan lang tekang lo.

Rome rongsopi.

Lepidus lapen Octavius elong adim ingnichom. Pompey mate alangtum ahotur kethenei, ron mai kevang aphi’ong Rome rongsopi nangkatebok’ong lo. Laso aphuthak si latum parsijik pen kachingvai.

“ Pompey ron mai kevang aphi’ong Rome anat nangpet’ong ke eson matha meme alam lo . Non amat khamkhe dunde ra langdunding pulote cheplangple lo. Itum a legion aphan non amat pachisik pachechedang pame ra ingtonpleng nangpo . Laso alam aphan itum lamso pu tinkok ke chokche!”

“ Rome rongsopi aphan ke itum ajat abidi pen sita cherai thekvek nangji. Pompey non ephong ke ingtangpik. Ne karjulong ateng pulote - talopi along dokai daru keklem pen kachepareng atum pen si Pompey kachepa’ok. Amena ajakong un’an chepangtang pen itum aphan ekachedanji si la arni ke’ong pen kachisik!” Laso alam aning kipung thektik pen si Octavius Lepidus aphan kethan.

“ Antony le itum along kavedet ta isi kethedung alam lo. Ron mai kachedan akrong ke alang kethek pame lapen kangtangrak amonit! Bonta meme huhe , ha Egypt arechopi Cleopatra along si chingthangdamling! Arje abon keme lapen alam kedok pen Cleopatra alangphan beidet. Nokbe chaibe pu si itum alangphan kachiki, bonta alang amena amat si amo chepavangvedet. Monit aso ta ingjinsothu meme apak!” Lepidus lam kaningje chington lo.

“ Nang kethan alam ahok lo. Non ason khei lapen det kisung ahut ke alang Egypt alar ladak Rome si do nangji! Rome rongsopi arat pini hotur phere nangkok. Lasi Antony asonson amonit aphan kenangsot thedung. Alngphan kepahangdam monit ketoi ke toi long lo. Ne kamatha ateng pulote lahei abirta longlok pen alang Rome chevangvekji. Athe lahei alam ardi alang ta chini. Ajat le chethan pusita Antony lapu’an kilu varet amonit kali!”----- Octavius Lepidus aphan kethakdun .

“ Tebonsitaa ladak adim ethe alam lapu helo--Arje abon kemeparpi laso arechopi aphan kachetongjong Antony aning angthin kai ateng kalidet, prekdak pu si ne ke karjulong!” Laso alam munthi lapen chere pame si Lepidus Octavius aphan kethan. Athe laso alam ajok Octavius alangphan akaprek mathadet tahai. Mat puthek laso alam kethan apot alangpran apharman kaphere meme alam doko tahai! Lapu’an le kali pusita alang laso alam pen kopine kisung thedung akisung ta pho’ilok ta hai.

“ Nang kethan alam le ahok pulote Antony itum along nangkedo dun ke thangnat ale ave lo! Bonta lahei vekvek vokvok alam aphan te itum emena mena, Rome rongsopi, Roman adet lapen Roman akhei amonophi alam si kethelang. Rome le jokvan pulote Roman akhei lapen adet ta jokvanpo. Inghong sinang, langsinang, keme’et lapen kechoklimji aphan le ining chepathedam sinang!” Octavius pu lo.

Mark Antony, Octavius lapen Lepidus, latum bang kethom ning isipet pen klemrappet damrappet si Julius Caesar thilot aphi Rome lapen Roman adet kachari kachalom pu si deng rong pen ke ketheklong. Bonta latum angbong ta kachememe the’o. Alangtum bangkehom angbong pen abangphutin ta bang hini aphan turchor si amena amat Roman adet achari chalom anghoi kangnitan aphan arlo arlo pen kabor’i kaike ta do. Laso alam pabiplak chetenplang alangbi ason, bonta arlo arlo ali kili aboi kangtangrak alangroi ason. Latum bang kethom angbong pen inutbak chepahaidet ra Roman arecho kechotan rat atum thek long dapprangpo pu si thekthek atum halaso ahut ta kamatha dun.

Antony Rome nangchele lo. Nanglerok aphi Octavius pen chetong lo. Octavius kepasilur ason do’o----

“ Kenangsot ahut pi athe si nang armu okso nangkapaleledet?”

“ Kopi athe si pu’an ajak kiding nang nangmena adet chepanung tekangkuk ra Egypt adet kanglimdamti nangpo lotang?”

“ Nangchor lapen nang ongsar nephan nangkahotur pu chinilor ta nag khamkhe dunde ra kelangdunding athe kopi ?”

Octavius alangphan lapu’an lamthe karju aphuthak Antony ano chedendedet ason. Nephan ma pu kipudundedet apot Octavius ke aphi’ong aning sedeng’ong lo. Bang hini ajirpo angbong lam ki kachedonde aphi’ong lit’ong lo. Langdunding te cheplangple lo lapen kerapdun sungkrungpo pu Lepidus matha lo. Octavius Caesar lapen Mark Aantony,bang hini ta laso ahut Roman ahamphang along ardi kedo amonit. Latum bang hini le chenam pha chenam kachervo pulote ale keklang ke memedetji theklor. Laso ale Roman akhei aphan si kahno dokokpo pu Lepidus tongsokot matha lo lapen lamthe phar dun lo. Bang hini angbong chethap dunthot ra Lepidus kephar dun alam ke lapu helo- ‘Khei kisung apor Antony lapen Octavius atum jirpopo kachervo veret ke thangnat ale ave lo. Ingtangrak thekser reset pu si pirthe amonit itum aphan ekachini lapen ekachethan. Apot si matha aling, ningje aling mate klem aling ta ili chere pamesen nangji. Ason pen mate ahut pen pulote kedamtang alam ili tingnevek nangkok. Mononphi kemesenji apharman itum mathavek nangji. Chethan aling sita jirpo Octavius achor arup pini ave lo. Achor arup ave te monit ke boche ingtung thekthe.Lasi ansose keme kechok apharman jirpo Antony eson akam klem nangpo. Akam thang ta kali. Alang jirpo Octavius angjirpi Octavia pen chepachor cheparup nangpo. Laso alam jirpo bang hini ta kroihur lo lapen isi apor ke lam ki kachedon ateng si Antony Octavius angjirpi Octavia pen chepachor cheparup lo. Malomso apor ke Roman arat lapen Roman armu okso angbong keme kechok atomon japphun lo.

Octavius angjir pen Antony chepangri chepangdon’et lo pu alam kachinijong Cleopatra ke ingchamhi nangman tanglo. Birta kepon atekela aphan Cleopatra kalili kalnglang ington ra ame pavanglap lo.

“ Amo kevangve Roman atekela! Antony piso kimi en’et lo pu abirta le nang kevan ta kehai, norokot amede le nangphan nangsekhak nangpasekhak lonang! Nangde panjuilong lonang, kemanme abang…….!” Roman atekela abang ke amek renglor rechopi alangphan lapu’an kangton apot kaphere a’ok klemphler lo lapen ladak dobom te nepran nemui si kedam nangpo pu matha ra un’an keprap pen Rome kachevangthuji aning hang lo. Aning hangtik laso atekela aphan ingtondet aphi isi apor ke Cleopatra aning run lo lapen tekela aphan Antony apiso kimi mate Octavia pu a’okarjang ko’anbak arje me pu arju lo. Ladak helo akan keme pu cheparesuvi ra tekela Cleopatra aphan lapuson si kethakdun

“ E,rechopi! Arnam nangliphan ansose nangpanghonnang, nangli nongme nangli thangme sining longle arum ansose pachethangnang! Antony apiso kimi ke inut hemepi penak le! arje keme kalangno alam le chethan meme ma. Mojiti ra kalangnoso kali. Nanglilong nangkachophodunji angden angdande ---!” Tekela angho pen amena aphan arje abon akele meparpik pu kero kacherjulong pen Cleopatra aning kamatha ajerso kachikirla angthek nangklang lo. Cleopatra kamatha—‘ Octivia arje abon keme le malu mala arloso anchot pulote kamatha kisung’oji adim ave! Prapjin pen ne Antony nelongthot nangchelevekpo!’

Paningve isi ke Antony ajo amek thekdunnak. Vo kamek’i alonrek ra amek selok padip padapde. Kopiching athe si lapuson kacheman ma pu Antony chipu thekthe. Adap kangthangjong inut thekkere aphan chehang si alang sang chelang lo. Thekkere menmen angtar thanthe si ingnijoi ra munthiding. Ajir dingklui aphi si thekkere angho kachingpu. Alangphan thekkere kethan----“ Antony akehai! nangli chere pamesen matik lo. Nangli kaike amat kachetongver lapen kachephosap amonit helo nangli hotur.”

“ Mai pu anset alam! To ante thekkere akehai! Neliphan nelikelang selet nelikilu selet amonit amen le thandak iknon!”

“ La ante Octavius helo. Ahokpet ke nangli rahi ingtangpik, bonta Octavius le nanglidung kevang pulote nangli dak nangli rahi, ke ingdukvok titi. Ladak helo nangliphan kisungkrungji adim ke. Apot si nangli chere pamesen matik lo.” Thekkere Octavius aphan thang dipde sopse pen do’an alam thanphlak lo. Octavius alngphan kelang selet pu alam Antony chini. Lepidus lapen Octavius; latum banghini ta Roman arat aphan amena amat si kachari chalom aning kehang pu alam ta Antony chini. Laso aning kehang along ke alangphan tovar along kebap angsu arhang ason si latum ketheklong pu ta alang chini. Thekkere Octavius amen keparno lasi alang manghuhe. Alang puthot thekkere aphan arjuthu lo---

“ Lapu pulote kopi keklem si kemepo?”

“ Keklem nangji ke esonvet lo. Ko’an ma nangli Octavius pen kedo kethak kachepahelothek lapu’an si keme. Thek pulote nangli ron mai ade along dodun ra armu okso atum aphan tovar japonrong si keme.”

“ Lapu pulote kememuchot alam lo. Nangli kethan ateng si neli ajat ta klempo. Ko’an ma keprap neli Rome rongsopi pen cheterekpo.” Thekkere aphan chelonchit ser atangka aplang pajir si Antony thakdun lo.

Antony,Octavius lapen Lepidus. Latum jirpo bang kethom chetongchom pen alangtum ahotur kethenei mate ha Julius Caesar akai dingpi kachelangseletnei ahotur Pompey pu inut khei isi angbong anokbe asopo alam chethan lo. Apo amen ason si la ta amen kachi’ir. Pompey asopo Pompey. Alangtum kamatha-----‘ chethan aling sitame Pompey ta itum amonit. Ron mai chedan ra laphan kepatikukrok ke lapu’an kethe’o alam kali, bonta lam ladak jutdetde. Hanso aphi kithuthedet ason lam ta aphi thuthe. Laphan pathilot te mo arnisi ke laso alar ikihuiji abangphu nangklang lepo. Ok alar ok,vi alar vi,pu alam do! Emena amonit angbong chepathi seroi veret nangji akenangsot kopi? Apot si Pomey pen itum chepame chepangsm lonang…..!’ Latum kachingvai mepik lo. Latum kachingvai alam prapjin pen Pompey along’an pale lo. Mark Antony, Octavius lapen Lepidus atum lapuson si kachingvai pu karjulong pen Pompey ta aning arong lo. Ning aklong pen Antony atum alam aki along nangchedon ddun lo pu Pompey ta birta nangpale lo. Kachingvai kachingsai pen keme kechok atovar kelong pu ra kadokave ta aning bohong rinti lo. Laso ning karong angthek kachepaklang pu ra Antony atum jirpo bang kethom aphan Pompey abang ha talo alangbi angbong amena atelong thepo along kecho kijun aphan hanglo. Latum bang kethom ta Pompey kepha ateng pen arnisi ke Pompey atelong thepo arlo arludunpak lo. Aning arong bohong pen telong arlo kechobom kijunbom ahut menmen kelang phere meme amonit latum angno vangphlut ra nangcheklanghamlo. Laso amonit ame Menas lapen lahelo talopi along telong pen beha bepar kedam atum aphan dokai daru keklem atum asongjapo. Amena armu okso asong along si Pompey laphan inut songjapo arpu kepekpon. Pompey aphan Menas ihin anat hangponjoi ra palamso lo

“ Non amat sita itum laso aron kehaidet abidi nelong do, nang pi si puji?” Pu pu amek kelang pabirlakchen si Menas Pompey aphan karju .

“ Ron mai chedande lo,chepame chepangsam lonag pu chekroidun tangdet aphi le kopu lo?”

“ Alam abang ke lapuloti, bonta matha pametha, latum aphan itum non amat ta chohai un!” kecho kijun anghoi anghu along ketotsar alohi atum aphan mate arvi ar’e chelangphrui si Pompy Menas aphan pu lo-----

“ Rome rongsopi mate Roman akhei angbong pen ketheknei kerenei bang kethom anokbe chaibe atum aphan si pini itum atelong arlo bengrui lo. Latum aphan le nang non amat pangsamri thek pulote Rome adet ke nangrideng si dopo! Nangphan anpar komatne dojilang pu he ?”

“ Latum bang kethom aphan non amat patanglirnang putong nang kamatha ma?”---Pompey Menas aphan arju lo.

“ Lapupe te pijilang? Lapen anpar akan keme nang longjilang ma? ” Menas Pompey aphan arju lo. Menas alamthe aphuthak Pompey menmen ke ajat ta thak dunde si munthiding ra dojoi. Laso alam aphuthak Pompey kamatha mongjet ra kedojoi ajr dingpik. Ha aphi klardak pen Pompey kaningje ke lapuson----

“ Nephan aphrang pen nechingvaivepin le nang laso akam kopu si keklemchaipo ? Munthi santhin pameme pen keklem akam ale ke henodak titi. Lam krehini chingvai chingsai ra chepame chepangsamdet aphi ning arong bohong pen chonang junnang, mo aphi kemesenji aphan chingki chethannang pu si ne latum aphan kephavek. Laso ateng pen si latum ladak kevang. Latum aphan pathiklipnon pu ne nangphan nangtoi un’e. Lapuson kachomatha a’ot adur amonit ne kali.” Menas aphan laso alam parju tekangdet aphi Pompey kecho kijun angdeng along chevangjui.

Non abatai ke Antony aphan Greece adet pen kevang Parthian armu okso atum nangkatengkheng pen Rome mate Roman adet aphan ron mai chedan ra kacheraikom adeng si ketang. Dorchit armu okso chepon si alang Greech arongbong Athens anat pangno lo. Athens along Greek atum pen ron mai kachedan odut ahut alang Rome pen lapuson si birta kelong—‘arnisihet chepame chepangsam seroi pen chechorap chijunrap pamesen ra lam ki kachesaptang ajirpo Pompey pen Octavia charvo’et lelo. Non ephong ke Lepidus si Pompey abe kidun.’ Laso abirta longlok pen alang aning kejangje thektik. Aphrang ap husar Julius Caesar asonthot pirthe kechothorji si Ocyavius ta aning kehang. Lepidus laso alam chinidundet. Chinidet aphi ke Octavius ke Lepidus aphan kelang pakengdingji alam amat si ave . Athepi alam ke mena amonit angbong arlo arlo kachikursung aphi’ong lit’ong lo.

Apiso kimi mate Octavia alangphan lasi karju -- ‘pi chonghoi si nang non malom, kecho kijun kedo kedam mate ajat amo along ta nangning chepasiksakdak ma ti?’ karju Alang lsi kethakdun

“ Nangning oidetri Octavia,! Munthidam sinang. Pini nang’ik Octavia aning kehang kopi? Kadokave aphan dongthor ra amena si akehoi kechoji pu! Lapuson le kopu lo? Laso akam pini alang klem lo, penap Lepidus klempo, penapdik ke ne apai klem lepo; lapu pulote Rome rongsopi, itum kachinghon arat lapen adet rengdok rengni pen do thekji thak thehji pu nang matha ma? Itum ajakong bopbedetji ma?”

“Nangtum aphan lam nagkephardun abang do nangkokpo!”

“ Lam nangkephardun abang? Doji pu he ?” –Antony apiso aphan kacherju.

“ Pu anset alam apot ajat mannon ne penap amat Rome dampo! Ne’ik pen ne chingki chethan damlang. Angjir akibi apok’et apot nelam nekroiji mene mena!” Don rap jirpi jirpo khei isi mei isi angbong kachelang selet,kachervo heihu Octavia achet ta aning hanghe. Aphi arni lasi Octavia Rome damphit lo.

Octavia a’ik aphan Rome rongsopi along chtongdam lo. Laso ahut a’ik aning me’o’e. kopine alam pen aning supong si do.

“ Pi athe si Athens pen kevangjui lo?” Octavia amu aphan kacherju.

“ Nelichor amena kevang thekthe alar si pini neli ladak kevang. Athens le nelitum dodamkok pusitame Rome abirta arnivang ta long.Chepame chepangsam tangdet aphi kopi athe si Pompey pen kacharvothulang ma! Lepidus aphan ta abe kidun pu si akoi kipi pu si karjulong.” Octavia a’ik aphan angton penlam than lo .

“Ha! nanglichor apharman si pini ladak kevang? Nangliphan mate amena aphan’an ta kachelang thekthe amonit apharman si nelilong kevang? Chini ma chinine Antony pini konat si do?” Ase chepangtangrai pen Octavia angjirpi aphan cherju lo.

“ Athens si do.”- Octavia a’ik along kethakdun.

“ Athens? Komat si nangkethan? Non amat Antony ha Egypt si do pu’an ta chichini dunde pu he? Ko’anbaktong arje keme’o lone labangso arechopi Cleopatra along si Antony chetar’et lo.” Octavia puthot ase kethe pen angjirpi aphan than lo. A’ik alam karjulongjong Octavia aning kejangje’ong ade angtur’an ta chepangbolap lo. A’ik pen alang lam ethe ta chedande si nangcheterekjui lo. A’ik kethan alam amokha lam kejoi kali pu alang mathadmlo. Pompey lapen Lepidus atum pen kachervo ajok kedodutji aron kangphaidunji ajakong alanglong pini ave pu alang chichini si aning oipik lo.

Egypt along penanso chekam ra kedo kethakrapchom Antony lapen Cleopatra atum, jo parni pirthe abirta long’et. Octavus alangtum aphan kelang pakengdingji abang kalilo pu alam ta chichini. Non ke Octavius mate alangtoi alangne atum Egypt nangtengkhengvekpo pu ta chini.

Ajo arni dingdedet lo. Nokbe Octavius kejapon, kangtangparpik Roman legion atum Egypt katengkheng nangpangcheng tanglo. ‘Kachepajokji abidi kopi lo?’- Antony lapen Cleopatra kamatha;-‘Lapu amat kithidun pangtar le kopu lo kechokpo?’

Latum ta kachesongdunji aphan chisik lo. Talopi angbong mate lang along telong pen kachedan, Egypt armu okso atum kethekpar; apot si lang athak kachedandun aphan latum chisik lo. Pine pina tomon tipli akethepi le menmen kevangphlut ason malomsovet angbong Octvius armu okso asong ron vang si Egypt adang the bi nangplengsaisaidet lo. Antony lapen Clropatra kedo arongsopi Alexendria aphan ta chekomchen lo. Antony lapen Cleopatra atum aphan Octavius birta pale lo---‘ Chethan aling pusitame, nangtum kachklem kachodam chokche tanglo. Apot si nangtum aphan Roman armu okso si nangparpongchen lo. Kekatji mate ason kaprek alam akam kamathaji apor nangtum aphan ave lo. Antony ta kerem chekrong ra netum angno nangchehodainon,Cleopatra ta lapuson thakthak lo. Nangsomar do’an pen netum along vang ra kerem lo pu nangchipunon! Jongsi kali pulote kithiji aphan chisikhurnon!”

Bonta Cleopatra ta kekomroro anbngpi kali. Chedan dundepin pen kerem kachekrongji ke alam amat si kali pu si alang kamatha. Do’an armu okso Roman atum pen kepachedan dunji aphan alang chisk lo. Aphi arni Egypt armu okso cheponpak si Antony amena akhei armu okso atum pen chedan dun lo. Bonta kopujilang! Kangtang thektik, kethek thektik Roman armu okso atum angno Egypt atum loban alonrek ta ave. Kachedancheng arni amat si Egypt armu okso ke ik’rang lo. Laso arni aningxethu, arni ingsamhup apor Roman atum Antony aphan kiri pacheplat’ang ta long thekthe si konatne katjui kali te arsikkrung adim chepatujoi pu ra Octavius along birt pale lo. ‘Ajatnon aphi arni kachedan ahut Antony aphan akithi tame akereng tame palongvek nangji, kenangsot pulote inghun ephar ta me inghan ephar mate lang arlo lutdun pusitame palongvek nangji’ pu ra amena armu okso atum aphan Octavius kapinkhat pasodak lo.

Aphi arni ke kachisiktang ateng si Egypt armu okso atum aphan chepon si lang along Antony kanghongdam. Laso arni ke pasongni ta bahari bahari atelong sarpo arlo chethap si ron kachedan rinti. Hum pharo ko’an atelontong me kecho,lang kanglim lone alakha avedet lo. Ame vanglap kachedan apot Roman armu okso ta penang’an ke sep lo, bonta ha kapadu ke latum si haidet lo. Ron mai ke Roman atum si kehai ke hai lo te ma bonta aphrang arni ason laso arni lethot ta Antony aphan arni kangsam apor thek longle tanglelo. Antony pen Cleopatra konattomg kilutruk lone badu ta pudun thek vangve. Akereng’ak’ak kenep kangnang mate kithitang arpum kelong ke kahelopik alam lo. Roman armu okso do’an ta manghuphrong lo. Latum matha, laso arongsopi arlo Antony atum mesen kachepatu adim dovek si do lo.

Halapu ke ron mai kehai kerem angring chinidet pen Cleopatra ke kaphere ajok chepatu dam’et lo. Aphrang pen- mo thilot aphi alang kithiang arpum kibi nangji pu longle arlo kikimmek ahem along Cleopatra ke chepachong dam’et lo. Vang abang aling sita ‘ Cleopatra thi’et lo, lapen laso athiri arlo si kipip’ pu le thannon pu achakri chakor atum aphan than pare pame lo. Aling sita Octavius aphan chohai un’e lo pu kachinijong Antony ta ron ade pen kekat kachepatudam angden thekthe. Cleopatra konat si kedoji ma alang chini lapen haladak si kedam pakengbon lo. Bonta haladak kele pen alang aning kedoknei abangpi Cleopatra pirthe pen chekak’et lo pu karjulongjong aphu artingphak lo. Halaso ahut alang kamathathek ke esonvet;-- ‘ pirthe angbong monit kedo’an pen alang kachinghonnei, abang bithe ser rup ketopklangben arje abon keme abangpi Cleopatra kavedet apirthe along kehondun pangtar alangphan ale kopi? Octavius amonit arideng chingnang ra apran amui kedam aphan te amena amat apran che’endet si keme dakreire.’ Antony kamatha apor padamdedet lo. Arideng kedo anokjirso pen aningthang lapen apok chetoksopsop lo. Avi chinsir tingdik ra pangthaitan lo. Antony amena apran kache’en lapu’an keprap; adung kebondunrin amena armu okso atum kekhamkhedun apor chelongle. Halaso ahutvek ke Cleopatra thihelang, kachepatuchot pu haladak kedo atonchari atum ke chini; apot si Antony lapuson keklemdet aphuthak kaphere achir amut ingbolap lo. Ajat mathatong thek vangve si latum manghuphrong lo. Kithitong thekthe avi sersang morang ra kacherdak kelangmejot ron apinpo aphan armu okso atum lang pame lo. Thithelang, achethe sinsin’an ke dolang. Cherap chiri ra latum Antony aphan rungponrin ra Cleopatra adung pon lo. Komatching atum si kevang ma akom en ra karjuton pu halaso ahut Cleopatra kithi chekrong ra jotlet si do. Antony abang arpum armu okso atum Cleopatra aning athak bat tekang kok si vangruk lo.

Malomso aphi ke Cleopatra amek chingpu si Antony aphan lang lo. Apok along pen avi kejang ahir kangtang’ong a pot Antony achethe sinsin si kithiji inkorang lo. Lam koson pen si lapuson keman longpop ma pu Cleopatra aphan Antony chethan bor’i bor’alang. Angton pen alam chinilir aphi Cleopatra aning dukpik lo, bonta alang non kopi si keklem thekjilang? Kopine klem ra Antony aphan parengthu thek pusita Octavius alangtum aphan akereng bijilang ma? Bibe lo. Athepi alam ke rechopi Cleopatra abidi kijut binong lo. Antony aphan aphu aphang phoroi lapen aning plilim’an ingjuplang. Laso aphi alang kaningje ----

“ Antony! Pi chomatha si nang lason le keklem ma ti!”

“ Arnam atum aning kehang si lason penak lo Cleopatra!” Arju long si’i ase pen si Antony kethakdun.”

“ O, ne nangkachinghon,Antony! Nephan ne’o tekangbup ra nang konat si kedampo ma! Nang kavedet apirthe athak ne kopuson si kerengdun thekpo….. ? Cleopatra kachiru kaningje. Cleopatra aphan bor’i bor’a ari ar’e pen bam lapen aphu ang’om phoroi si Antny ningjelang.

“ Cleopatra! Pirthe athak, mindar athak ne nanglong nangdo dun thekthe lo. Bonta nangkai kidinng nephan nang netingnedetri. Nang chini pame! Ahokpet ke ne inut nokbe, chaibe. Pini ne thek’en hotur atum pen chesong dun lo. Penang’an ke ne halatum aphan pathi pajang dun lo. Bonta kopujilang! Arnam aning kehang alam. Ne pini rem nangkok lo. Bonta puthot ning chibi tame ne inut phon vo’ak….. kali….ne….un’e lo Cleo…..che…kak…..nang…che…..!” Antony lapu’an si lam ningje unchot lo. Kijut un’e akai apharman Cleopatra adung pen Antony cheterek si damjui lo. Julius Caesar apateng chale karjap Mark Antony akai amelur lapuson si mepchok lo.

Antony kithitang abang arpum arbakhet ra ko’an aportong Cleopatra kedo lone amena chipu thekthe. Alang kamatha –‘ kithi abang ke thilot lo, kereng’ak atum non kopi krklem si kemepo? Jat klemkle ra lapu dolun pulote laso ale ke henodakji. Malomso aphi te Roman armu okso atum ladak nanglepo, nangle lote kopi si cheplangji ma la ke chini pame lo.’ Apot si alang achethe kavetang Mark Antony abang arpum longle athak bijoi ra arjap lo . Achakor chakri do’an aphan adung chehang si alang pu lo----

“ arjuhurtha! Pini helo itum aphan pirthe athak kahenonei arni. Non malomso aphi lote Roman atum ladak vang si itum aphan nangnep nang’ingnanglappo. Ha Rome rongsopi’an itum aphan marat api kachithur ason echithur ponpo. Kopu lo ili kachechak unpo! Laphan te itum thilap si keme lo . Apot si nangtum komat koson si kethek ma nangmena mena apran che’enlapnon. Paderrinon athe latum non amat nanglepo.

Laso ningjedet aphi Cleopatra amena asirkut chilutdam si pe ri akemenei chingthangdam lo. Aphu along ta ser rup minik mukita kedoi’etjo aphutup nukrak chikup lo. Cleopatra isi ser anghoi athak ingni lo lapen inut a ban aphan pinkhat si isi thesere kethap ‘i, adip kedo hoton pavan lo. Angno nagkelejong Cleopatra hoton adip hekjok ra arlo ari ar’e pen chphu si ejon bahari aruiphe thepo enphlut lo. Angphun kitumkak aphurui abang kacherdak ahir kangtangso ta kali. Malomsovet angbong laso aphurui rechopi Cleopatra avam keper pachekommit. Ke’ot pachip pame ra angno kachevan aphurui aphan langding si Cleopatra kaningje---

“ To, phurui recho,, pini ke nephan pap pun keplengbong laso apirthe pen kijut un’e akai apharman kachetrekji atovar nethanji nethanthe ta nang anchot lo. Lapu’an arni an akai nangphan ne laso aton arlo bundi bundok nangbi lo. Pini ke nang ta bundi bundok pen kejok lo. Nephan ne’archu tekang ra nanglong kedo abi aban do’an nebang arpum nepajum tekangnon. Nepran nemui ne’en tekang ra konat ma ning kehang damnon. Pirthe athak mindar athak nening kachingsamnei apinso Antony along ne ta dunpo.” Cleopatra aphan palongni palongthom adim phurui archu lo. Inghongpik nangnedet lo; pirthe athak do’an arloso angbong pen arje abon keme, kethek kere pu anong athang kachethangphlup arloso,Cleopatra mate Egypt adet arechopi akai amelur ta ladak amat si mepchok lo. Cleopatra abang arpum ta aning kehang apinso, nokbe Mark Antony adung si longle athak tidunvoi’an si manchot lo.

Kalang ta kalang, malomso aphi Roman armu okso atum laso adim nangledun’et lo. Antony lapen Cleopatra bang hinina akithitang arpum elongvet tichom thek longlok si kadokave ta manghuphrong lo. Laso abirta Octavius along le lo. Octavius birta kelong pen vangphit. Alang kachinghon ajrpo mate pini arni ke sai jokje ra hotur kacgkamnang abangpo lapusom a’ot pen kithi apot nokbe Octavius ta aning oi lo. Mekkri meklang ta chiti lo.

Lasodet aphi ke Julius Caesar kachopathe kachopading aso, Octavius Caesar kepatirpipon Roman legion arideng si Egypt achari chalom ta damjui lo. Aphi’an ke Octavius si Roman akhei arecho cholo.Octavius Caesar helo kechengsi Roman arecho. Aphi’an ke Augustus Caesar pu si alangliphan monit aum kachini.